Yayımlanan Epşteyn sənədləri çərçivəsində Fələstinli əhalinin sayının azaldılmasına yönəlik planları ehtiva edən bir səs yazısı üzə çıxıb. Səs yazısında İsrailin sabiq baş naziri Ehud Barakın, ölkənin demoqrafik strukturunu dəyişmək məqsədilə Rusiya Prezidenti Vladimir Putindən 1 milyon Rusiya yəhudisinin İsrailə köçürülməsi üçün lobbiçilik apardığını söylədiyi eşidilir.
Manset.az xəbər verir ki, Epşteynlə Ehud Barak arasında baş tutmuş gizli görüşməyə aid olduğu bildirilən səs yazısı İsrailin demoqrafik siyasəti ilə bağlı müzakirələri yenidən alovlandırıb.
Middle East Eye (MEE) nəşrinin məlumatına görə, Barak bu addımın İsrailin demoqrafiyasını dramatik şəkildə dəyişəcəyini və Fələstinli əhalinin siyasi və sosial təsirini zəiflədəcəyini deyib.
Barakın açıqlamaları İsrailin İkinci Dünya müharibəsi dövründə və sonrasında Avropadan yəhudilərin Fələstin torpaqlarına köçürülməsi və ərəb əhalinin etnik təmizləməyə məruz qalması siyasətinin mahiyyət etibarilə dəyişmədiyini bir daha gündəmə gətirib.
14 fevral 2015-ci il tarixli səs yazısında Barak, Sovet İttifaqının dağılmasından sonra 1990-cı illərdə İsrailə köçən təxminən 1 milyon insanın ölkəni köklü şəkildə dəyişdirdiyini vurğulayır. Lakin 2005-ci ilə gəldikdə bu köçkünlərin yarıdan azının Ortodoks yəhudi hüququna görə yəhudi sayıldığını xatırladaraq, gələcəkdə “köçün keyfiyyətinə nəzarət edilməsinin” vacibliyini müdafiə edir.
O, Rusiyadan gələcək köçkünlərin ilkin şərt olmadan qəbul edilə biləcəyini, lakin sosial təzyiq və xüsusilə ikinci nəsillə birlikdə bu çevrilmə prosesinin zamanla baş verəcəyini iddia edir.
