30 iyul Mərakeş Krallığının milli bayramı – Taxt-Tac Günüdür.
Manset.az xəbər verir ki, bu münasibətlə Bakıda rəsmi qəbul təşkil olunub.
Mərasimdə Azərbaycan Respublikasının mədəniyyət naziri Adil Kərimli, ölkəmizdəki diplomatik korpusun nümayəndələri və digər şəxslər iştirak ediblər.
Tədbirdə əvvəlcə Azərbaycanın və Mərakeşin Dövlət himnləri səsləndirilib.
Mərakeşin Azərbaycandakı səfiri Məhəmməd Adil Embarş çıxış edərək ölkəsinin son illərdəki inkişaf yolundan danışıb.
Diplomat çıxışında həmçinin Mərakeşlə Azərbaycan arasında münasibətlərin hazırki vəziyyətindən məmnunluğunu bildirib. Qeyd edib ki, iki ölkənin müxtəlif sahələrdə əməkdaşlıq əlaqələri ildən-ilə inkişaf edir, dərinləşir.
Mərasimdə Azərbaycan Hökuməti adından çıxış edən mədəniyyət naziri Adil Kərimli dost ölkənin milli bayramı münasibətilə təbriklərini çatdırıb.
Qeyd olunub ki, bu gün ölkələrimiz siyasi dialoqla yanaşı, iqtisadi, mədəni və humanitar sahələrdə də uğurla əməkdaşlıq edir. İki ölkə rəhbərlərinin siyasi iradəsi və səmimi dostluq münasibətləri Azərbaycan-Mərakeş əlaqələrinin hərtərəfli inkişafında mühüm rol oynayır.
Çıxışlardan sonra mərasim ziyafətlə davam edib, bədii proqram təqdim olunub.
