Azərbaycan əsrlər boyu müxtəlif etnik və dini qrupların birgə yaşadığı məkandır. Bu zəngin mədəni müxtəliflik ölkənin sosial və siyasi həyatında tolerantlıq və multikulturalizmin əsas təməlini qoyub. Müasir dövrdə Azərbaycan cəmiyyətində müxtəlif din və millətlər arasında hörmət və qarşılıqlı anlaşma mühiti qorunub saxlanılır. Dövlət siyasəti milli və dini müxtəlifliyi qorumaqla yanaşı, bu dəyərlərin beynəlxalq müstəvidə təbliğini də həyata keçirir. Multikulturalizm yalnız daxili sabitliyi təmin etmir, həm də Azərbaycanın beynəlxalq nüfuzunu artırır. Bu model gənc nəsillərə fərqlilikləri qəbul etməyi öyrədir, cəmiyyətin həmrəylik ruhunu möhkəmləndirir. Eyni zamanda, multikultural dəyərlərin qorunması ölkəmizin mədəniyyətinin dünya miqyasında tanıdılmasına da xidmət edir.
Mövzu ilə bağlı Manset.az-a danışan deputat Mehriban Vəliyeva bildirilib ki, Azərbaycan Respublikası tarixən müxtəlif xalqların və dinlərin sülh, qarşılıqlı hörmət və əməkdaşlıq şəraitində yaşadığı bir məkandır:
"Ölkəmizdə tolerantlıq və multikulturalizm ənənələri əsrlər boyu formalaşaraq bu gün də dövlət siyasətinin əsas istiqamətlərindən birinə çevrilmişdir. Dövlət milli və dini müxtəlifliyi qorumaqla yanaşı, bu dəyərlərin beynəlxalq müstəvidə təbliğini həyata keçirir.Azərbaycanda tolerantlıq və multikulturalizm sahəsində mühüm işlər görülmüşdür. 2016-cı ilin “Multikulturalizm ili” elan olunması, Bakı Beynəlxalq Multikulturalizm Mərkəzinin yaradılması və xüsusi dövlət proqramlarının icrası bu istiqamətdə mühüm addımlardır. Konstitusiya və qanunvericilik aktları bütün vətəndaşlara bərabər hüquqlar verir, onların azad və təhlükəsiz fəaliyyətinə zəmanət yaradır. Müxtəlif dini icmaların sərbəst fəaliyyəti, məbədlərin bərpası və dövlət tərəfindən dəstəklənməsi ölkədə dini tolerantlıq mühitini gücləndirir. Ali məktəblərdə “Azərbaycan multikulturalizmi” fənninin tədrisi, elmi tədqiqatların aparılması və beynəlxalq konfransların təşkili sahədə maarifləndirici rol oynayır".
M.Əliyeva bildirib ki, beynəlxalq əməkdaşlıq çərçivəsində təşkil olunan Bakı Humanitar Forumu, Mədəniyyətlərarası Dialoq Forumları, Dünya Dini Liderlərinin Sammiti Azərbaycanın multikultural dəyərlərinin dünyada təqdim olunmasına imkan yaradır:
"Tolerantlıq və multikulturalizm yalnız tarixi irs deyil, həm də dövlət siyasətinin əsas prinsiplərindən biridir və artıq beynəlxalq miqyasda nümunəvi model kimi qəbul olunur. Gələcəkdə maarifləndirmə, beynəlxalq əməkdaşlıq və mədəniyyətlərarası dialoqun daha da gücləndirilməsi Azərbaycanın tolerantlıq ənənələrinin möhkəmlənməsinə və dünyada nüfuzunun artmasına xidmət edəcəkdir".
O həmçinin vurğulayıb ki, ölkədə şiə və sünni müsəlmanların eyni məsciddə ibadət etməsi və müxtəlif dinlərin nümayəndələrinin bərabərhüquqlu hiss etməsi multikulturalizm modelinin əsas uğurlu tərəflərindən biridir:
"Bu təcrübə beynəlxalq müstəvidə nümunəvi model kimi qəbul olunur və Azərbaycanın sabitlik, sülh və inkişaf prinsiplərinin göstəricisidir".
Seyranə Quliyeva
6.3.15. dini və milli tolerantlıq, millətlərarası münasibətlərin inkişaf etdirilməsi;
Yazı Medianın İnkişafı Agentliyinin maliyyə dəstəyi ilə hazırlanıb
