Avropa Futbol Assosiasiyalarının İttifaqı (UEFA) Ukraynanın "Dnepr-1" klubunu 2024/25 mövsümü üçün Konfrans Liqasından kənarlaşdırıb.
Manset.az xarici mediaya istinadla xəbər verir ki, Apellyasiya Komitəsi Konfrans Liqasının II təsnifat mərhələsinin Macarıstanın "Puşkaş Akademiyası" klubu ilə matçlarında "Dnepr-1"ə iki texniki məğlubiyyət verib.
"Dnepr-1" iki oyunun (25 iyul və 1 avqust) baş tutmamasına görə məsuliyyət daşıyıb və buna görə də cəza alıb.
Bundan əvvəl Ukrayna çempionatının son mövsümündə dördüncü yeri tutan "Dnepr-1"in iflas ərəfəsində olduğu və fəaliyyətini dayandıra biləcəyi barədə məlumatlar yayılıb.
Qeyd edək ki, klub 2015-ci ilin noyabrında yaradılıb.
Fidan Əliyeva
Manşet.az
