Azərbaycan Türkiyədən hərbi təlim təyyarələri almaq üçün danışıqlar aparır.
Manset.az xəbər verir ki, bu barədə məlumatı Türkiyə KİV-i yayıb.
Məlumata görə, Türkiyənin nüfuzlu aviasiya şirkətlərindən olan "Turkish Aerospace Industries" (TAİ) Azərbaycanın Azərbaycana yeni nəsil təlim-tədris təyyarələri "Hürkuş-II"nin satışı üzrə müqavilənin bağlanmasına yaxınlaşıb. Bu barədə TAI-nin baş direktoru Mehmet Demiroğlu Yeni il müraciətində məlumat verib.
Müqavilə imzalanarsa, Azərbaycan kursantları ilkin mərhələdən sonra uçuş hazırlığını "Hürkuş-II" təyyarələrində davam etdirəcək. Bu, pilot hazırlığının Türkiyə modeli ilə uyğunlaşdırılmasına imkan verəcək. Növbəti mərhələdə Azərbaycan "Hürjet" reaktiv təlim təyyarəsi almağı da planlaşdırır.
Türkiyə şirkəti, həmçinin Azərbaycanın Su-25 hücum təyyarələrinin modernləşdirilməsi üzrə LACIN layihəsinin ikinci mərhələsinə başlayıb. Layihə çərçivəsində təyyarələrin avionikası tam yenilənəcək və rəqəmsal idarəetmə sisteminə keçid ediləcək. Su-25-lərin müasir yüksək dəqiqlikli silahlarla uyğunlaşdırılması nəzərdə tutulur.
Daha əvvəl aparılan sınaqlarda modernləşdirilmiş Su-25-dən uzaqmənzilli raketlərin buraxılışı uğurla həyata keçirilib.
