Haitinin paytaxtı Port-o-Prensin şərqində quldur dəstəsinin törətdiyi hücumlar nəticəsində 43 nəfərin öldüyü bildirilir.
Manset.az xarici mediaya istinadən xəbər verir ki, yayılan xəbərə görə, paytaxta bağlı Kenskoff qəsəbəsində “Viv Ansanm” adlı quldur dəstəsi bazar günü gecə silahlı hücum təşkil edib.
Məlumata əsasən, hücum edənlər qəsəbə mərkəzinə nəzarəti ələ keçirməyə çalışıb, evləri yandırıb və çox sayda insanı qaçırıblar. Hücumlardan sonra Kenskoff küçələrində 43 meyit gördüyünü deyənlər onların güllələndiyini qeyd ediblər.
Təhlükəsizlik qüvvələrinin quldur dəstəsinin hücumunu dəf etməsindən sonra bölgədə əməliyyatlar davam etdirilib. Bu müddətdə küçə və prospektlərdə güllə yaraları olan meyitlərin aşkarlandığı bildirilib.
Kenskoff bələdiyyəsinin başçısı Jean Massillon baş verənləri tam mənada “qətliam” adlandırıb. O, “AlterPresse” agentliyinə açıqlamasında yerli hakimiyyət orqanlarının meyitlərin götürülməsi məqsədilə məhkəmə orqanları ilə birgə rəsmi müəyyənləşdirmə və araşdırma işləri apardığını bildirib.
Birləşmiş Millətlər Təşkilatının Haitidə İnteqrasiya Ofisinin (BINUH) məlumatına görə, ölkədə zorakılıq halları 2026-cı ilin ilk rübündə — yanvar-mart aylarında — azı 1 642 nəfərin ölümünə, 745 nəfərin isə yaralanmasına səbəb olub.
Bu statistikaya martın 29-dan 31-dək Aşağı Artibonit bölgəsində 16 yaşayış məntəqəsində 72 saat ərzində 83 nəfərin öldürüldüyü kütləvi qətliamların da daxil olduğu bildirilir.
