Azərbaycan Dillər Universitetinin (ADU) rektoru,
akademik Kamal Abdulla Tbilisidə keçiriləcək beynəlxalq payız düşərgəsində
iştirak hüququ qazanan tələbələrlə görüş keçirib.
Manset.az-ın məlumatına görə, rektor tələbələri təbrik edərək qeyd edib ki, ADU-nun tələbələrinin beynəlxalq layihələrdə fəal iştirakı universitetin beynəlxalq əməkdaşlıq strategiyasının və alman dili tədrisinin yüksək səviyyəsinin göstəricisidir. O, tələbələrə uğurlar arzulayıb və onları Azərbaycan gəncliyini layiqincə təmsil etməyə çağırıb.
Görüş Alman Akademik Mübadilə Xidmətinin (DAAD)
dəstəyi ilə keçiriləcək “Cənubi Qafqazda körpülər qurmaq: Dialoq və görüşlər”
adlı beynəlxalq payız düşərgəsi münasibətilə təşkil olunub.
31 oktyabr – 10 noyabr 2025-ci il tarixlərində Tbilisidə baş tutacaq proqram alman dilində ən azı B1 səviyyəsində biliklərə malik Cənubi Qafqaz regionundan olan tələbələr üçün nəzərdə tutulub. Azərbaycan üçün ayrılmış 7 yerin 4-nü ADU tələbələri qazanıblar.
Tədbirdə Alman Akademik Mübadilə Xidmətinin
nümayəndəsi xanım Lisa Brandt və Alman dilinin fonetikası və qrammatikası
kafedrasının müdiri, dosent Qahirə Axundova da iştirak ediblər.
Lisa Brandt ADU tələbələrinin uğurunu yüksək
qiymətləndirib, universitetlə uzunmüddətli əməkdaşlığın əhəmiyyətini
vurğulayıb.
Qahirə Axundova isə tələbələrin seçim mərhələsində göstərdiyi fəallığı və motivasiyanı qeyd edərək, bu cür layihələrin dil və mədəni ünsiyyət bacarıqlarının inkişafında mühüm rol oynadığını bildirib.
Sonda tələbələr düşərgəyə hazırlıq prosesi,
gözləntiləri və əldə edəcəkləri təcrübələrin gələcək təhsillərinə verəcəyi
töhfələr barədə fikirlərini bölüşüblər.
