Ümumi praktik həkim Conatan Vebster yaşdan asılı olaraq orqanizmin fərqli miqdarda suya ehtiyac duyduğunu bildirib.
Manset.az Ölkə.az-a istinadən xəbər verir ki, həkimin sözlərinə görə, 4-8 yaşlı uşaqlar üçün gündəlik su norması 1,2 litrdir. Yeniyetmə oğlanlara 1,6-1,9 litr, qızlara isə təxminən 1,5 litr su tövsiyə olunur. 60 yaşdan aşağı kişilər üçün gündəlik norma təxminən 2 litr, qadınlar üçün isə 1,6 litrdir.
Vebster qeyd edib ki, yaş artdıqca suya ehtiyac azalmır, sadəcə susuzluq hissi zəifləyir. Buna görə 60 yaşdan yuxarı insanlara gündə orta hesabla 1,6-2 litr maye qəbul etmək tövsiyə olunur.
Həkim vurğulayıb ki, bu göstəricilər orta hesabladır və fərdi norma iqlim, fiziki aktivlik və ümumi sağlamlıq vəziyyətindən asılı olaraq dəyişə bilər.
Onun sözlərinə görə, su çatışmazlığı yorğunluq, baş ağrısı və diqqət azalması kimi problemlərə səbəb ola bilər. Xüsusilə uşaqlarda su balansına nəzarət vacibdir, çünki su həzm, bədən temperaturunun tənzimlənməsi və beyin inkişafında mühüm rol oynayır.
