Litva hökuməti, 22 mindən çox şəxsə – o cümlədən 8 yaşlı uşaqlara dron hazırlamaq və istifadə etməyi öyrətməyi planlaşdırır. Bu təşəbbüs, ölkənin mümkün Rusiya təhlükəsinə qarşı müdafiə qabiliyyətini artırmaq məqsədi daşıyır.
Manset.az-ın xarici mediaya istinadən məlumatına görə, layihə çərçivəsində 8–10 yaşlı uşaqlara sadə dronların hazırlanması və uçurulması, orta məktəb şagirdlərinə isə daha mürəkkəb dronların dizaynı, istehsalı və istifadəsi öyrədiləcək. Litva Müdafiə Nazirliyi, 3,3 milyon avro büdcə ilə FPV dronlar, idarəetmə sistemləri və mobil tədris tətbiqləri almağı planlaşdırır.
Müdafiə naziri Dovile Sakalienė bildirib ki, 2028-ci ilə qədər 15.500 böyük və 7.000 uşaq dron idarəetmə bacarığı qazanacaq. Ölkənin müxtəlif bölgələrində dron təlim mərkəzləri də yaradılacaq.
Bu proqram, Müdafiə və Təhsil nazirliklərinin birgə təşəbbüsü ilə dərsdənkənar kurslar şəklində həyata keçiriləcək və sivil müdafiə hazırlığını gücləndirməyə yönəlib.
