28 sentyabr 2025-ci il tarixində
Bakı Gənclər Mərkəzində ReadENG nəşriyyatının təşkilatçılığı ilə ölkəmizdə ilk
dəfə olaraq “ReadENG – İngilis dili müəllimlərinin I Forumu” keçirilib. Forumun
əsas mövzusu “Xarici dilin tədrisində çağırışlar” idi və tədbir ingilis dili müəllimlərinin
peşəkar inkişafı, təcrübə mübadiləsi və müasir yanaşmaların müzakirəsi üçün
mühüm platformaya çevrilib.
Manset.az xəbər verir ki, tədbirin əvvəlində Azərbaycan dövlət
himni səsləndirilib. 3 nõmrəli xüsusi
internat məktəbinin müəllimi, bədii rəhbər Günel Kərimovanın başçılığı ilə eṣitmə
və nitq məhdudiyyətli gənclərdən ibarət "Danışan Mələklər" qrupu
himni müşaiyət ediblər.
Ardınca Vətənimizin azadlığı və ərazi bütövlüyü uğrunda canından keçmiş şəhidlərimizin əziz xatirəsi bir dəqiqəlik sükutla yad edilib.
Forumun açılışında ReadENG nəşriyyatının
direktoru Murad Ahiz və həmtəsisçisi Arzu Ahiz çıxış edərək nəşriyyatın təhsil
sahəsində gördüyü işlərdən, müəllimlər üçün yeni resurslar təqdim etmək və peşəkar
inkişaf imkanlarını genişləndirmək istiqamətində atılan addımlardan danışıblar. Onlar vurğulayıblar ki, ReadENG müəllimləri bir araya gətirən və innovativ təlim
resursları ilə dəstəkləyən təşəbbüsləri ilə təhsil ekosistemində yeni bir hərəkat
yaratmağı qarşısına məqsəd qoyur.
Həmçinin tədbirdə nəşriyyatın
direktoru Murad Ahiz müəllimlərin öz
ixtisasları üzrə şagirdlərinin nəticələrinə nəzarət edə biləcəkləri, şagirdlərin
isə mütəmadi olaraq sərbəst öz biliklərini yoxlaya biləcəkləri xüsusi
yaradılmış, ödənişsiz sınaq saytı olan https://testet.az
saytını təqdim edib.
Tədbirin fəxri qonaqları — Elm və Təhsil
Nazirliyi yanında İctimai Şuranın sədri, professor Hikmət Əlizadə, Milli Məclisin
deputatı Ceyhun Məmmədov və Elm və Təhsil Nazirliyi yanında İctimai Şuranın
katibi, xarici dil üzrə mütəxəssis Günay Əkbərova — çıxış edərək xarici dil tədrisinin
inkişaf perspektivlərindən, müəllimlərin peşəkar dəstəklənməsinin vacibliyindən
və təhsil sahəsində yeni yanaşmalardan bəhs ediblər.
Professor Hikmət Əlizadə müəllimlərin qlobal çağırışlara uyğunlaşmasının önəmini vurğulayaraq bu cür forumların müəllimlər arasında şəbəkələşməyə böyük imkan yaratdığını qeyd etdi. Deputat Ceyhun Məmmədov dövlətin təhsilə verdiyi dəstəkdən və müəllim peşəsinin nüfuzunun yüksəldilməsi istiqamətində görülən işlərdən danışdı. Xarici dil üzrə mütəxəssis Günay Əkbərova isə beynəlxalq təcrübələrin paylaşılmasının və müasir metodikaların tətbiqinin müəllimlərin peşəkar inkişafına verdiyi töhfələri önə çəkib.
Forum çərçivəsində həmçinin panel
müzakirəsi təşkil olundu. Paneldə təhsil sahəsinin nüfuzlu mütəxəssisləri - Banövşə
Məmmədova (ADU Tərcümə fakültəsinin dekanı, professor), Elçin Orucov (Daxili
İşlər Nazirliyinin Polis Akademiyasının Dil Hazırlığı kafedrasının rəisi, polis
polkovniki), Taira Axundova (Dövlət Gömrük Komitəsi Akademiyasının ingilis dili
müəllimi) çıxış edərək xarici dil tədrisində qarşılaşılan praktiki çağırışlar,
tələbələrin motivasiyası, yeni texnologiyaların istifadəsi və müəllimlərin davamlı
inkişaf yolları barədə müzakirələr aparıblar. Panelin moderatoru Günay Əkbərova
olub və müzakirəni dinamik şəkildə idarə edərək mövzunun müxtəlif aspektlərinin
iştirakçılar tərəfindən işıqlandırılmasına şərait yaradıb.
Forum iştirakçılarına sertifikatlar
təqdim olunub, həmçinin hədiyyələr paylanılıb. Tədbirin ən həyəcanlı anı isə
Galaxy Travel şirkətinin sponsorluğu ilə keçirilən püşkatma olub. Püşkatmanın nəticəsində
qalib seçilən iki müəllimə Bakı–İstanbul (gediş-dönüş) və Bakı–Füzuli
(gediş-dönüş) istiqamətində ikinəfərlik aviabiletlər təqdim edilib.
Media tərəfdaşları — Azxeber.com,
Editor.az,
Manset.az, Veteninfo.az, 32gun.az, Bizimmedia.az, Konkret.az — tədbirin
geniş ictimaiyyətə çatdırılmasına mühüm dəstək veriblər. ReadENG nəşriyyatı
elan etdi ki, bu kimi forumlar mütəmadi şəkildə keçiriləcək və ingilis dili müəllimlərinin
peşəkar inkişafı üçün yeni imkanlar yaradılacaq.
