Əl və ayaqların soyuqdan rəng dəyişməsi sadəcə üşümə ilə bağlı deyil, ciddi sağlamlıq probleminin də göstəricisi ola bilər.
Manset.az News24.az-a istinadən xəbər verir ki, mütəxəssislər bu vəziyyətin Reyno adlanan damar xəstəliyi ilə əlaqəli olduğunu bildirirlər.
Dr. O'Donovanın sözlərinə görə, Reyno xəstəliyində dəriyə qan aparan kiçik arteriyalar soyuğa və stressə reaksiya olaraq daralır. Bu da qan axınının azalmasına, soyuqluq, keyimə və rəng dəyişiminə səbəb olur. Əvvəlcə dəri ağarır, sonra maviyə çalır, bəzən isə qızartı ilə müşahidə olunur.
Həkim bildirir ki, bu əlamətlər əsasən barmaqlarda yaranır, lakin burun, qulaq və dodaqlarda da özünü göstərə bilər. Qan dövranı bərpa olunarkən isə sancı, qıcıqlanma və şişkinlik müşahidə oluna bilər.
Mütəxəssislər xəbərdarlıq edirlər ki, Reyno tutmaları ən çox soyuq hava, soyuq suya toxunmaq və ya emosional stress zamanı baş verir. Buna görə əlləri isti saxlamaq və stressi minimuma endirmək vacibdir.
