Atalar sözləri xalqın əsrlər boyu qazandığı zəngin həyat təcrübəsinin, müşahidələrinin və müdrükliyinin bədii və lakonik ifadəsidir. Bu hikmətli kəlamlar bir nəfərin qələmindən birdən-birə çıxmayıb, minilliklər ərzində formalaşaraq nəsildən-nəsilə ötürülüb.
Manset.az Metbuat.az-a istinadən xəbər verir ki, atalar sözlərinin yaranma tarixi bəşəriyyətin ilk kollektiv təfəkkür dövrünə, insanların təbiətlə, cəmiyyətlə və bir-biri ilə münasibətlərini anlamağa başladığı zamanlara dayanır.
İnsanlar gündəlik həyatda, təsərrüfatda, müharibələrdə və ya sosial münasibətlərdə müəyyən hadisələrlə qarşılaşarkən nəticələrdən pay çıxarıblar. Müəyyən bir şəxs yaşadığı və ya şahid olduğu hadisədən dərs alaraq onu yığcam, dərin mənalı və qafiyəli bir cümlə ilə ifadə edib. Zaman keçdikcə bu ifadə dil-dildən gəzib, cəmiyyət tərəfindən qəbul olunub və fərdi xarakterini itirərək xalqın ümumi sərvətinə çevrilib. Müəllifin kimliyi unudulub, lakin dediyi fikir “atalar deyib” tərkibi ilə yaşamağa davam edib. Buradakı “ata” sözü təkcə bioloji valideyni deyil, bütövlükdə keçmiş nəsilləri, elin ağsaqqallarını və təcrübəli müdriklərini təmsil edir.
Atalar sözlərinin formalaşmasında folklordan, nağıllardan, dastanlardan və tarixi rəvayətlərdən gələn süjetlər də böyük rol oynayıb. Bəzən böyük bir əhvalatın və ya dastan boyunun yekunu olaraq söylənilən bir cümlə müstəqil işlənərək atalar sözünə çevrilib. Eyni zamanda, formaca ritmik, poetik və yadda qalan olması onların əsrlər boyu unudulmadan bu günümüzə qədər gəlib çatmasını təmin edib. Bu gün işlətdiyimiz hər bir atalar sözü arxasında böyük bir yaşam tarixi və sınanmış həqiqət gizləyən mənəvi xəzinədir.
