NASA astronavtı Mayk Finkke Beynəlxalq Kosmik Stansiyada (IKS) ilk dəfə baş verən təxirəsalınmaz təxliyənin səbəbini açıqlayıb.
Manset.az xarici mediaya istinadən xəbər verir ki, Finkke kosmosda olduğu zaman birdən-birə danışmaq qabiliyyətini itirdiyini söyləyib.
15 yanvar tarixində "SpaceX Crew Dragon" kapsulunun San Dieqo sahillərində okeana eniş etməsindən sonra yaşanan tibbi təxirəsalınmaz vəziyyətlə bağlı məlumatlar məhdud şəkildə paylaşılmışdı. Keçən ay NASA erkən dönüşün səbəbinin Finkke olduğunu təsdiqləmişdi.
Hadisə 7 yanvarda bir kosmik yürüş hazırlığından sonra axşam yeməyi zamanı baş verib. Finkke birdən-birə danışa bilmədiyini hiss edib: "Tamamilə gözlənilməz idi. Çox sürətlə inkişaf etdi".
Təxminən 20 dəqiqə davam edən bu vəziyyət zamanı hər hansı bir ağrı hiss etmədiyini bildirən astronavt sonradan özünü normal hiss etdiyini deyib. İki komanda yoldaşı dərhal müdaxilə edərək Yer üzündəki uçuş həkimləri ilə əlaqə qurublar.
59 yaşlı astronavt o gündən bəri oxşar bir problem yaşamadığını və həyatında ilk dəfə belə bir vəziyyətlə qarşılaşdığını qeyd edib.
Astronavt tibbi gizlilik səbəbilə daha ətraflı məlumat paylaşamayacağını da bildirib. NASA-nın bənzər halların olub-olmadığını anlamaq üçün digər astronavtların sağlamlıq qeydlərini araşdırdığı haqqında məlumat verilib.
