Mütəxəssislərə görə, Ramazanda uzun müddət aclıq çəkmək çəki itirmək üçün kifayət deyil. İmsakı ötürmək, tək bir yeməyə yüklənmək və şərbətli şirniyyatlar qəbul etmək, maddələr mübadiləsini ləngidərək çəki artımına səbəb ola bilər.
Manset.az xəbər verir ki, Ramazan ayında dəyişən yemək nizamı və maye istehlakı, birbaşa olaraq maddələr mübadiləsinə təsir edir. Antalya Belek Universitetinin Qastronomiya və Aşpazlıq Sənətləri Bölümünün araşdırmaçısı və pəhriz mütəxəssisi Dr. Ayden Özekinci Ramazanda qidalanmanın düzgün planlaşdırılmadığı halda bədənin yağ yığmağa daha meylli hala gəldiyini söyləyib:
İmsakı ötürmək ən böyük səhvdir
Çəki itirmək məqsədilə imsaka qalxmamağın çox yayılmış amma yanlış bir seçim olduğunu vurğulayan Dr. Ayden Özekinci imsak yeməyinin gün boyu maddələr mübadiləsinin düzgün işləməsinə kömək etdiyini bildirib. Uzun müddət aclıqdan sonra iftarda sürətli və həddindən artıq yemək qan şəkərini ani şəkildə yüksəldir və bu da yağ yığılmasına səbəb ola bilər.
Tək yemək və şirniyyat
Ramazanın aralıqlı oruc sisteminə bənzər xüsusiyyətlər daşıdığını qeyd edən Dr. Ayden Özekinci qidalanmanın yanlış planlaşdırılması halında əzələ itkisi və maddələr mübadiləsinin yavaşlamasının baş verə biləcəyini bildirib. Yalnız bir yeməklə qidalanmaq, yetərli protein almamaq və tez-tez şərbətli şirniyyat istehlakının Ramazan sonrasında sürətli çəki artımına səbəb ola biləcəyini diqqətə çatdırıb.
İftarı iki hissəyə ayırmaq faydalıdır
Sağlam çəki nəzarəti üçün iftarın su və xurma ilə açılmasını, sonra isə şorba içildikdən sonra qısa bir ara verilməsini tövsiyə edən Dr. Ayden Özekinci bu üsulun porsiyon nəzarətini asanlaşdırdığını bildirib. Əsas yeməkdə isə qızartmalar yerinə qaynadılmış, qril və ya sobada hazırlanmış yeməklərin seçilməli olduğunu qeyd edib.
Hərəkət və su istehlakı önəmlidir
İftardan sonra tamamilə hərəkətsiz qalmanın maddələr mübadiləsini yavaşlada biləcəyini söyləyən Dr. Ayden Özekinci yeməkdən təxminən bir saat sonra ediləcək yüngül tempdə gəzintilərin çəki nəzarətinə kömək edəcəyini vurğulayıb.
Meyvənin iftardan dərhal sonra istehlak edilməməli olduğunu qeyd edən Dr. Ayden Özekinci meyvənin ən azı iki saat sonra yeyilməsini tövsiyə edib. Əlavə olaraq, çay və qəhvənin su yerinə keçmədiyini və xüsusilə sahurda su, ayran və süd kimi içkilərin seçilməli olduğunu fikirlərinə əlavə edib.
