Marsdan gəldiyi iddia edilən, Yerə düşən ən böyük meteorit Sotheby's Hərrac Evində keçirilən tədbirdə 5,3 milyon dollara satılıb.
Manset.az xarici mediaya istinadən xəbər verir ki, hərracda 25 kiloqramlıq NWA 16788 meteoritinə olan son təklif 4,3 milyon dollar olub, lakin komissiya və əlavə haqlar daxil edildikdə satış qiyməti 5,3 milyon dollara çatıb.
Sotheby's-in ekspertləri meteoritin Marsdan gəldiyini xüsusi laboratoriya sınaqları ilə təsdiqləyib. Həmçinin, meteoritin kimyəvi tərkibi 1976-cı ildə "Viking" sondasının Marsa enməsi nəticəsində müəyyən edilmiş nümunələrlə uyğun gəlir.
Sotheby's-in Təbiət Tarixi üzrə vitse-prezidenti Kassandra Hatton, meteoritin Marsdan gələn ən böyük və ən tam nümunə olduğunu qeyd edərək, "Bu, əvvəllər tapılan ən böyük parçadan iki dəfə daha böyükdür", — deyə bildirib.
2023-cü ildə Nigerin Sahara səhrasında meteorit ovçusu tərəfindən tapılan NWA 16788, Marsın səthindən asteroidin zərbəsi nəticəsində ayrılaraq Yerə çatıb. Bu meteorit təxminən 225 milyon kilometrlik bir yolu qət edib.
Mütəxəssislər, asteroidin Marsa zərbəsi nəticəsində meteoritin şüşəyə çevrilmiş bəzi hissələrini də qeyd ediblər. Eyni zamanda, meteoritin Yer atmosferinə daxil olarkən yaranan şüşəli xarici qabığı, onun uzun və sərt səyahətinin izlərini daşıyır.
Bu nadir meteoritin alınması ilə tədqiqatçılar, Marsın tarixini və onun səthinin tərkibini daha dərindən öyrənmək imkanı qazanacaq.
