Alimlər NASA-nın “InSight” roverinin göndərdiyi seysmik məlumatlara əsaslanaraq Marsın daxili quruluşunu yenidən modelləşdiriblər. Aparılan tədqiqatlar nəticəsində müəyyən edilib ki, Qırmızı Planetin mantiyasında 4,5 milyard il əvvələ aid nəhəng qaya parçaları hələ də mövcuddur.
Manset.az xəbər verir ki, tədqiqat Böyük Britaniyanın “Imperial College London” universitetindən Dr. Konstantinos Xaralambusun rəhbərlik etdiyi elmi qrup tərəfindən aparılıb. Alimlər səkkiz böyük marszəlzələsi və meteorit toqquşması nəticəsində əldə edilən seysmik dalğaları təhlil ediblər.
Seysmik məlumatların təhlili nəticəsində müəyyən olunub ki, Mars mantiyasında uzunluğu 4 kilometrə çatan iri qaya blokları mövcuddur. Bildirilib ki, bu parçalar planetin yaranma mərhələsində, Günəş sisteminin ilk 100 milyon ili ərzində baş verən intensiv kosmik toqquşmaların izləridir.
Araşdırmalara görə, həmin dövrdə Mars, Yer və Venera kimi daxili planetlər güclü meteorit bombardmanına məruz qalıb. Bu toqquşmalar Marsın erkən qabığını parçalayaraq nəhəng maqma okeanlarının yaranmasına səbəb olub. Daha sonra bu maqma soyuyaraq kristallaşıb və nəticədə müxtəlif tərkibli qaya strukturları mantiyaya yerləşərək orada qalıb.
Mütəxəssislər qeyd edirlər ki, Yerdə belə strukturlar plitə tektonikasının səbəb olduğu geoloji dəyişikliklər nəticəsində çoxdan itib. Lakin Marsda tektonik hərəkətlərin zəif olması səbəbindən bu qədim geoloji izlər indiyədək qorunub saxlanılıb.
Tədqiqatçılar bildirirlər ki, Marsın daxili hissəsində qorunan bu qədim geoloji müxtəlifliklər planetin geoloji tarixi və təkamülü barədə unikal məlumatlar təqdim edir. Marsda əldə olunan nəticələr həmçinin Venera və Merkuri kimi digər planetlərin daxili quruluşunun öyrənilməsi baxımından da əhəmiyyətli hesab olunur.
Araşdırmanın nəticələri nüfuzlu “Science” jurnalında dərc olunub.
