“Atherosclerosis” jurnalında dərc olunan yeni araşdırmaya görə, göz ətrafında yaranan solğun və şişkin sarı ləkələr – ksantelazmalar infarkt, insult və keçici işemik tutma riskinin erkən göstəricisi ola bilər.
Manset.az xarici mediaya istinadən xəbər verir ki, sözügedən ləkələr makrofaq adlanan immun hüceyrələrinin xolesterin və digər yağlarla dolması nəticəsində yaranır. Qanda yüksək xolesterin səviyyəsi ilə tez-tez əlaqələndirilən bu vəziyyət öz-özlüyündə zərərsiz hesab edilsə də, qan damarlarında yağ lövhələrinin toplanması nəticəsində yaranan aterosklerozla (damarların sərtləşməsi) oxşar bioloji prosesə malikdir.
Stenford Universitetinin tədqiqatçıları tərəfindən aparılan araşdırmada ksantelazma diaqnozu qoyulmuş 17 925 nəfərin tibbi məlumatları göz müayinəsindən keçmiş və ksantelazması olmayan, onlara uyğun seçilmiş nəzarət qrupu ilə müqayisə edilib. Nəticələrə əsasən, ksantelazması olan şəxslərdə infarkt keçirmə göstəricisi 1 faiz olduğu halda, nəzarət qrupunda bu göstərici 0,35 faiz təşkil edib. İlk il ərzində insult riski ksantelazma qrupunda 0,95 faiz, nəzarət qrupunda isə 0,30 faiz olub. Keçici işemik tutma riski isə müvafiq olaraq 0,60 və 0,19 faiz təşkil edib.
Beş və 10 illik müşahidə müddətində iki qrup arasındakı fərq azalsa da, ksantelazması olan şəxslərin infarkt, insult və keçici işemik tutma keçirmə ehtimalının əhəmiyyətli dərəcədə yüksək olaraq qaldığı müəyyənləşdirilib.
Araşdırmanın diqqətçəkən digər nəticəsi qanda xolesterin və digər yağların səviyyəsi normal olan ksantelazmalı şəxslərdə də ürək-damar və beyin-damar hadisələrinin başvermə riskinin oxşar şəkildə yüksək olmasıdır. Tədqiqatın nəticələri göstərir ki, göz ətrafındakı sarı ləkələr yalnız yüksək xolesterinin deyil, həmçinin hələ tam öyrənilməmiş digər sistemik risk amillərinin göstəricisi ola bilər.
