Ötən gün Heydər Əliyev Sarayı növbəti dəfə mədəniyyət və gənclik bayramına ev sahibliyi edib.
Manset.az xəbər verir ki, Azərbaycan Gənclər və İdman Nazirliyi və Azərbaycan Uşaq Fondunun dəstəyi ilə təşkil olunan “ŞHK Junior Liqa – Anar Məmmədxanov Kuboku” çərçivəsində Bakının 18 məktəb komandası böyük səhnədə öz istedadını nümayiş etdirib.
Layihənin bədii rəhbəri və tədbirin aparıcısı Səməndər Rzayev proqramın yüksək əhval-ruhiyyədə və dinamik keçməsinə töhfə verib. Komandalar maraqlı və gərgin mübarizə şəraitində çıxış edərək tamaşaçıların rəğbətini qazanıblar.
Yarışın nəticələri aşağıdakı kimidir:
Böyük Qızıl Kubok
6 nömrəli məktəbin yığması – “Palata №6”
Böyük Gümüş Kubok
189-190 nömrəli məktəblərin yığması – “Abrakadabra”
Böyük Bürünc Kubok
Bakı Avropa Liseyi – “Fantastik Dördlük” KVN komandası
Kiçik Qızıl Kubok
17 nömrəli məktəbin yığması – “Əhmədli Şumu”
Kiçik Gümüş Kubok
56 nömrəli məktəbin yığması
Kiçik Bürünc Kubok
18 nömrəli məktəbin yığması – “Şəhər Uşaqları” KVN komandası
Həmçinin, yarışda iştirak edən bütün komandalara xatirə kubokları təqdim olunub.
Tədbirin münsiflər heyətində Murad Dadaşov, Cavid Şahbazbəyov, Zəhra Bədəlbəyli, İradə Məmmədxanova, Hacı Nuran Hüseynov və Nəriman Abdullayev yer alıblar.
Sonda çıxış edən münsiflər heyətinin üzvü və ŞHK Junior Liqanın direktoru Cavid Şahbazbəyov bildirib ki, layihə “Bakılı oğlanlar” ŞHK-nın əfsanəvi kapitanı Anar Məmmədxanovun xatirəsinə həsr olunub. O qeyd edib ki, gecə parlaq və enerjili keçib, bu cür layihələr gənclər üçün böyük səhnəyə çıxış imkanı yaradır və yeni ŞHK nəslinin formalaşmasına xidmət edir.
