"Qırmızı qızıl" kimi tanınan zəfəran dünyanın ən bahalı ədviyyatı olaraq qalır. Premium keyfiyyətli məhsulun qiyməti bir qram üçün təxminən 10-12 dollara çata bilər. Bu yüksək qiymətin əsas səbəbi isə onun becərilməsi və yığılması prosesinin son dərəcə mürəkkəb olmasıdır.
Manset.az Lent.az-a istinadən xəbər verir ki, hər bir çiçəkdə cəmi üç nazik qırmızı dişicik ağızcığı olur və ədviyyat kimi məhz onlar istifadə edilir.
Cəmi bir kiloqram qurudulmuş zəfəran istehsal etmək üçün təxminən 150 min çiçək əl ilə toplanmalıdır. Hazır məhsulun çıxımı olduqca az olduğundan zəfəran yetişdirmək üçün geniş əkin sahələri və böyük əmək sərfi tələb olunur.
Bir kiloqram zəfəran üçün 400 saat əmək tələb olunur
Zəfəranın yığılması prosesini mexanikləşdirmək mümkün deyil. Çiçəklər çox həssas olduğu üçün onlar yalnız əl ilə toplanır. İstehsalçıların hesablamalarına görə, bir kiloqram zəfəran əldə etmək üçün təxminən 400 saat insan əməyi sərf edilir. Məhsulun qiymətinin böyük hissəsini də məhz əl əməyinin yüksək payı təşkil edir.
Məhsul cəmi üç həftəyə yığılmalıdır
Zəfəranın digər mühüm xüsusiyyəti onun çox qısa çiçəkləmə dövrünə malik olmasıdır. Zəfəran payızda cəmi iki-üç həftə çiçək açır. Buna görə də fermerlərin məhsulu toplamaq üçün çox məhdud vaxtı olur. Çiçəklər günəş çıxmamış toplanır. Bunun səbəbi günəş şüalarının təsiri altında ətir və dad verən maddələrin zədələnməsinin qarşısını almaqdır.
Zəfəran steril bitkidir və həyat qabiliyyətli toxum əmələ gətirmir. Buna görə də hər yeni bitki yalnız insanlar tərəfindən kök yumrularının əkilməsi ilə yetişdirilir. Başqa sözlə, bu bitkinin mövcudluğu tamamilə fermerlərin əməyindən asılıdır.
