Hərəkətsiz həyat tərzi keçirən insanlar üçün qidada zülalın həddindən artıq qəbulu gözlənilən faydanı verməyə, əksinə, qocalma prosesini sürətləndirməyə səbəb ola bilər.
Manset.az Baku.ws-ə istinadən xəbər verir ki, bu nəticəyə ABŞ-nin Viskonsin-Medison Universitetinin alimləri gəliblər. Tədqiqatın nəticələri "Cell Press Blue" jurnalında dərc olunub.
Alimlər zülal istehlakı ilə bağlı 350-dən çox elmi araşdırmanı təhlil ediblər. Nəticələr göstərib ki, aşağı zülallı qidalanma heyvanlar üzərində aparılan təcrübələrdə maddələr mübadiləsini yaxşılaşdırıb, iltihabı azaldıb və ömür uzunluğunu artırıb.
İnsanlar üzərində aparılan qısamüddətli tədqiqatlarda da oxşar nəticələr əldə olunub. Belə ki, iştirakçılarda qan şəkərinin səviyyəsi yaxşılaşıb, bədəndə yağ kütləsi və çəki azalıb. Maraqlıdır ki, bu dəyişikliklər qida rasionunun kalori miqdarı azaldılmadan müşahidə edilib.
Mütəxəssislər bildirirlər ki, zülalın azaldılması insulinə həssaslığı artıran və iltihabı zəiflədən FGF21 hormonunun səviyyəsini yüksəldir. Bununla yanaşı, hüceyrələrin böyüməsinə cavabdeh olan siqnal yollarının aktivliyi azalır, hüceyrələrin özünü yeniləmə mexanizmi isə daha səmərəli işləyir ki, bu da yaşlanma prosesini ləngidə bilər.
Araşdırmada xüsusilə metionin, izoleysin və valin amin turşularına diqqət yetirilib. Bu maddələrin həddindən artıq qəbulu, xüsusilə az hərəkət edən insanlarda piylənmə, xroniki iltihab və yaşla bağlı xəstəliklərin riskini artıra bilər. Həmin amin turşuları əsasən ət, balıq, yumurta və idman əlavələrinin tərkibində yüksək miqdarda olur.
Bununla yanaşı, alimlər vurğulayırlar ki, nəticələr hər kəsə şamil edilmir. İdmançılar, hamilə qadınlar, uşaqlar, travmadan sağalan şəxslər və əzələ kütləsini qorumağa ehtiyacı olan yaşlı insanlar üçün yüksək zülal qəbulu vacib olaraq qalır.
Tədqiqat müəlliflərinin fikrincə, gündəlik zülal norması müəyyən edilərkən yalnız yaş deyil, insanın fiziki aktivlik səviyyəsi də nəzərə alınmalıdır.
