Meksikada sosial şəbəkələrdə makiyaj videoları ilə məşhurlaşan 23 yaşlı TikTok fenomeni Valeria Markes canlı yayım zamanı silahlı hücuma məruz qalaraq həyatını itirib.
Manset.az xarici mediaya istinadən xəbər verir ki, hadisə ölkədə geniş rezonans doğurub.
Yerli medianın məlumatına görə, qətldə əsas şübhəli Markesin sevgilisi olduğu iddia edilən və “Doble R” ləqəbi ilə tanınan cinayətkar kartelin üzvüdür. El Heraldo nəşri yazır ki, cütlük bir müddətdir münasibətdə olub və hücumun qısqanclıq zəminində baş verdiyi ehtimal edilir.
İddialara görə, Valeria Markesin sosial şəbəkədəki izləyicilərindən aldığı bahalı hədiyyələr “Doble R”in qəzəbinə səbəb olub. Meksika mətbuatı bildirir ki, “Doble R” daha əvvəl də bir sıra zorakılıq və qətl hadisələrində iştirak edib. Onun adı 2012-ci ildə meyiti kanalizasiyada tapılan venesuelalı model Daisy Ferrer Arenasın qətli ilə də əlaqələndirilir.
Hadisə ilə bağlı hüquq-mühafizə orqanları tərəfindən araşdırmalar davam etdirilir.
