Rusiya İqtisadi İnkişaf Nazirliyi ölkədə işləməkdən imtina edən xarici şirkətlərin yerli nümayəndəliklərinə kənar idarəçilərin təyin olunmasını təklif edir. Bu, ən azı 25 faizi xarici şirkətlərə, fiziki şəxslərə məxsus olan subyektlərə aiddir. Bununla Rusiya hökuməti xarici şirkətləri ölkədən çıxmamağa stimullaşdırmaq niyyətindədir.
Manset.az bildirir ki, Musavat.com xarici agentliklərə istinadən xəbər verir ki, təklifə əsasən fəaliyyətini dayandıran xarici şirkətlə bağlı məhkəməyə müraciət olunmalıdır. Rəhbərliyi 24 fevraldan etibarən Rusiyanı tərk edən, əmlakını ölkədən çıxaran şirkətlərlə bağlı Moskva Arbitraj Məhkəməsinə müraciət olunacaq. Məhkəmə əmlakın, iş yerlərinin saxlanması, aktivlərin dondurulması haqda qərar çıxaracaq. Bu zaman xarici sahibkar 5 gün müddətində məhkəməyə müraciət edərək fəaliyyətini bərpa etmək, satmaq, yaxud etibar etdiyi şəxslərə vermək istəyini bildirməlidir.
Müvəqqəti idarəçi təyin olunduqdan 3 ay sonra yenilənmiş şirkətin səhmləri hərraca çıxarılacaq. Bu zaman eyni sahədə fəaliyyət göstərən alıcılara üstünlük veriləcək.
Beləliklə, Rusiya hökuməti faktiki olaraq ölkədə fəaliyyətini dayandıran xarici şirkətlərin əmlakını əlindən almağı hədəfləyir.
ABŞ hökuməti isə bu varianta əl atılarsa, Moskvaya qarşı xüsusi tədbirlərə əl atacağını bəyan edib. Bu barədə bugünkü ənənəvi brifinqdə jurnalistlərin suallarını cavablandıran Ağ Evin mətbuat katibi Cen Psaki məlumat verib: “Əgər Rusiya tərəfindən belə addımlar atılarsa, əminəm ki, biz də tədbirlər görəcəyik”.
