Boston şəhərinin mərkəzində təlim keçirən FTB və ABŞ Ordusu Xüsusi Əməliyyatlar Komandanlığının üzvləri yanlış otel otağına basqın edərək içəridəki şəxsi saxlayıblar. ABŞ Ordusunun Xüsusi Əməliyyatlar Komandanlığı çaşqınlığa görə üzr istəyib.
Manset.az-ın xarici mediaya istinadən məlumatına görə, FTB bildirib ki, Boston bölməsi çərşənbə axşamı axşam saat 22 radələrində "öz personalının yerləşdirilən mühitdə qarşılaşa biləcəyi vəziyyəti simulyasiya etmək üçün" təlimdə orduya kömək edib.
"Yanlış məlumatlara əsaslanaraq, onlar səhvən yanlış otağa göndərilib və nəzərdə tutulan rol oyunçusunu deyil, başqa bir şəxsi saxlayıblar" – FTB açıqlayıb.
ABŞ Ordusunun Xüsusi Əməliyyatlar Komandanlığı, polkovnik-leytenant Mayk Börns CNN-ə deyib: "İlk növbədə, təlimdən zərər çəkmiş şəxsdən dərin üzr istəyirik".
Börns təlimin "əsgərlərin real və qeyri-ənənəvi mühitlərdə xidmət qabiliyyətini artırmaq" məqsədi daşıdığını ifadə edərək, hadisənin araşdırıldığını bildirib.
FTB heç kimin xəsarət almadığını bildirib.
Manşet.az
