Beyləqanda yol-nəqliyyat hadisəsi zamanı vəfat edən qadının qohumları ilə polis arasında insident yaşanıb.
Manşet.az Qafqazinfo-ya istinadən xəbər verir ki, hadisə bu gün saat 18:00 radələrində rayonun Günəşli kəndi ərazisində baş verib.
Belə ki, qəza zamanı avtomobildəki qadın sərnişin həlak olub. Hadisə yerinə dərhal polis əməkdaşları cəlb olunub və onlar ekspert müayinəsindən keçirilməsi məqsədilə meyiti morqa aparıblar. Lakin mərhumun qohumları meyitin ekspertizadan keçirilməsinə etiraz edərək morqun binasına girməyə çalışıblar.
Məsələ ilə bağlı DİN-in Mətbuat Xidmətindən “Qafqazinfo”ya bildirilib ki, bir qrup kənd sakini meyitin ekspertizadan keçirilməsinə etiraz edərək morq binasının önünə toplaşlblar: “Həmin şəxslər polislərin, müstəntiqlərin və ekspetlərin işinə mane olublar. Tələb ediblər ki, qadının meyiti müayinədən keçirilmədən onlara təhvil verilsin. Sakinlərə dəfələrlə qanunun tələbləri izah olunub. Lakin onlar buna məhəl qoymadan morqun binasına girməyə cəhd göstəriblər. Kənd sakinləri xəbərdarlıqlara məhəl qoymadığı üçün polis tərəfindən havaya atəş açılıb. Bundan sonra həmin şəxslər sakitləşərək ərazini tərk ediblər. Meyit ekspert müayinəsindən keçirilib. Qanuna uyğun sənədləşmə işləri tamamlandıqdan sonra meyit ailə üzvlərinə təhvil verilib. Sakinlər Beyləqan Rayon Polis Şöbəsinə dəvət olunub. RPŞ rəhbərliyi tərəfindən onlarla profilaktik söhbətlər aparılıb və bu kimi halları anlayışla qarşılaması xahiş olunub”.
