Göy üzü ilin ən diqqətçəkən təbiət hadisələrindən birinə hazırlaşır.
Manset.az xəbər verir ki, 12 avqust 2026-cı il, çərşənbə günü tam Günəş tutulması baş verəcək.
Ayın Yer ilə Günəş arasına daxil olması nəticəsində bəzi ərazilərdə Günəş tamamilə örtüləcək və gündüz saatlarında qısa müddət ərzində hava qaralacaq.
Tam tutulmanın müşahidə ediləcəyi xətt Qrenlandiya, İslandiya və İspaniyadan keçəcək. Avropanın bir sıra ölkələrində isə tutulma qismən müşahidə olunacaq. Böyük Britaniyanın bəzi ərazilərində Günəşin 90 faizindən çoxu Ay tərəfindən örtüləcək.
Tam tutulma zamanı Günəşin normal şəraitdə görünməyən xarici atmosferi müşahidə etmək mümkün olacaq.
12 avqustda daha bir diqqətçəkən səma hadisəsi – Perseid meteor yağışı da zirvəyə yaxınlaşacaq. Meteor yağışının 12-13 avqust gecəsi daha intensiv müşahidə ediləcəyi gözlənilir.
