Taylandın Sa Kaeo əyalətinin Ban Nonq Çan kəndində fövqəladə vəziyyət elan olunub.
Manset.az “The Nation” qəzetinə istinadən xəbər verir ki, Rəsmi Bangkok bu addımı Kambocanın sərhəd bölgələrində “vətəndaş iğtişaşları yaratmağa çalışması” ilə izah edib.
Məlumata görə, iyul ayında tərəflər arasında baş verən toqquşmalara və əldə olunan atəşkəs razılaşmasına baxmayaraq, iki ölkə arasında gərginlik yenidən artıb.
Tayland hökuməti Kambocanı sərhəd kəndlərində qeyri-sabitlik yaratmaqda ittiham edib. Bu səbəbdən Ban Nonq Çan kəndində fövqəladə vəziyyət elan edilib. Tayland ordusu əraziyə hərbi hissələr, polis qüvvələri və mülki şəxslərdən ibarət sülhməramlı qüvvələrin göndəriləcəyini açıqlayıb.
Qeyd edək ki, mayın 28-də baş verən qısamüddətli sərhəd toqquşmaları sülh yolu ilə həll olunub. Lakin iyulun 24-də yenidən baş verən insident nəticəsində 32 nəfər həyatını itirib.
İyulun 28-də Malayziyanın vasitəçiliyi ilə keçirilən danışıqlarda tərəflər “dərhal və qeyd-şərtsiz atəşkəs” barədə razılığa gəliblər.
