Şahzadə Diananın məşhurlaşan "qisas donu" rekord məbləğə satıla bilər.
Manset.az xəbər verir ki, bu barədə "Metro" nəşri məlumat yayıb.
Britaniyalı dizayner tərəfindən yaradılmış, ürək formalı dekoltesi olan bu geyim dekabr ayında Nyu-Yorkda keçiriləcək "Sotheby's" hərracına təqdim ediləcək. Nəşrin məlumatına görə, libasın ilkin qiymətləndirmə dəyəri 110 min funt-sterlinqlə 220 min funt-sterlinq arasında dəyişir.
Satışdan əldə olunan gəlirin bir hissəsi əlavə qayğı, avadanlıq və layihələrin maliyyələşdirilməsi ilə məşğul olan Kral Edinburq Xəstəxanası adından "NHS Lothian Charity" xeyriyyə təşkilatına bağışlanacaq.
Geyimlə yanaşı, şahzadə Diana və dizayner tərəfindən imzalanmış və nömrələnmiş kataloq nüsxəsi də hərraca çıxarılacaq.
Qeyd edək ki, "qisas donu" 1994-cü ildə III Karl (o vaxtkı şahzadə Çarlz) Kamilla ilə münasibətini etiraf etdikdən sonra şahzadə Diananın bu libasda ictimaiyyət qarşısına çıxması ilə kulta çevrilmişdi. Stilist Enn Harvi sonralar bildirib ki, şahzadə həmin axşam "bir milyon dollar" dəyərində görünmək istəyib və bu səbəbdən son anda məhz bu geyimi seçmək qərarına gəlib./Oxu.Az
