ABŞ Konqresinin Büdcə Ofisinin yaydığı hesabata görə, İrana qarşı həyata keçirilən əməliyyatların Pentaqona dəyəri 38 milyard dollara çatıb.
Manset.az xarici mediaya istinadən xəbər verir ki, ABŞ Konqresinin Büdcə Ofisi (CBO) fevralın sonunda İrana qarşı “Epik Qəzəb Əməliyyatı” adı ilə başlanan hərbi əməliyyatın dəyərini dörd əsas kateqoriya üzrə araşdırıb: əməliyyat xərcləri, alternativ imkanların dəyəri, iqtisadi təsirlər və mümkün əlavə xərclər.
CBO-nun yaydığı hesabatda İranla baş verən silahlı qarşıdurmanın əməliyyat xərclərinin avqustun 1-nə olan məlumata əsasən təxminən 38 milyard dollar təşkil etdiyi bildirilir. Qeyd olunub ki, xərclər əsasən istifadə edilmiş sursatın yenidən tədarükü, döyüşlər zamanı itirilmiş hərbi texnikanın əvəzlənməsi, uçuş saatlarının artması, ərazidə aparılan əməliyyatlar və yanacaq xərclərinin yüksəlməsi ilə əlaqədardır.
Hesabatda azalan hərbi ehtiyatların ABŞ-nin silah arsenalını bir neçə il ərzində zəiflədə biləcəyi vurğulanıb. Bildirilib ki, yaranan çatışmazlıq xüsusilə Çin kimi geniş ballistik və qanadlı raket arsenalına malik ölkələrlə mümkün böhranlar zamanı ciddi təhlükəsizlik riskləri yarada bilər.
