Bu sözləri Manset.az-a açıqlamasında Milli Məclisin deputatı Vasif Qafarov deyib.
O xatırladıb ki, Prezident İlham Əliyevin Səudiyyə Ərəbistanının “Əl-Ərəbiyyə” telekanalına verdiyi müsahibədə diqqət çəkən əsas məqam onun Azərbaycanın milli maraqlarını qətiyyətlə və prinsipiallıqla müdafiə etməsi və eyni zamanda emosional deyil, hüquqi-siyasi çərçivədə davranmasıdır:
“Təyyarə hadisəsi kimi faciəvi situasiyada belə dövlət başçımız emosional gərginliyə yol vermədən, araşdırma və sübutlarla danışma yolunu seçib ki, bu da dövlət idarəçiliyi baxımından təmkin və siyasi peşəkarlıq nümunəsidir”.
Deputat söyləyib ki, Prezident İlham Əliyevin həm 2020-ci ildə rus helikopterinin vurulması hadisəsinə istinad edərək Azərbaycan tərəfinin necə operativ şəkildə məsuliyyət daşıdığını və üzr istədiyini vurğulaması, həm də bu gün oxşar münasibətin Rusiyadan gözlənildiyini bildirməsi diplomatiyada bərabərlik və qarşılıqlılıq prinsiplərinin tələb olunması baxımından mühüm mesajdır:
“Eyni zamanda, həm təyyarə hadisəsinin, həm də Rusiya ərazisində azərbaycanlılara qarşı baş verən hadisələrin vurğulanması Prezident İlham Əliyevin öz vətəndaşlarının hüquqlarını qorumaq məsuliyyətinə nə dərəcədə xüsusi önəm verdiyini göstərir. Bu isə dövlət başçısının xalq qarşısında məsuliyyətini nümayiş etdirir və milli həmrəyliyi ggücləndirir Dövlət başçısının “mənfi ssenari haqqında düşünmək istəmirəm” fikri isə əslində Azərbaycanın gərginliyi artırmaq yox, regionda sabitliyin qorunmasına üstünlük verdiyini göstərir. Azərbaycan tərəfi münasibətlərdə göstərdiyi qətiyyət və prinsipalılıqla yanaşı, sülh və dialoq yoluna üstünlük verir. Bu isə həm region üçün, həm də beynəlxalq tərəfdaşlar üçün çox müsbət bir mesajdır”.
“Nəticə etibarilə, Prezident İlham Əliyevin mövqeyi həm dövlətçilik baxımından prinsipial və qətiyyətli, həm də diplomatiya baxımından balanslıdır. O, milli maraqları qorumaqla yanaşı, gərginliyi daha da artırmamaq üçün məsuliyyətli və rasional davranış nümayiş etdirir ki, bu da Azərbaycanı regionda sabitlik və konstruktiv siyasət tərəfdarı kimi göstərir”, - deyə deputat Vasif Qafarov əlavə edib.
