Müasir dünyada dövlətlərin beynəlxalq aləmdə mövqelərinin möhkəmlənməsində təkcə rəsmi diplomatik münasibətlər deyil, həm də diaspor quruculuğu və lobbiçilik fəaliyyəti mühüm rol oynayır. Qlobal siyasi, iqtisadi və mədəni mühitdə milli maraqların müdafiəsi artıq yalnız hökumətlərarası əlaqələrlə məhdudlaşmır. Bu gün hər bir ölkə üçün güclü diaspor şəbəkəsi həm milli kimliyin qorunmasında, həm də dövlət maraqlarının beynəlxalq müstəvidə təbliğində əsas vasitələrdən biri hesab olunur. Azərbaycan da müstəqillikdən sonra keçdiyi inkişaf yolunda diaspor quruculuğu və lobbiçilik sahəsində ciddi təcrübə formalaşdırıb.
Mövzu ilə bağlı Manset.az-a danışan Milli Məclisin deputatı Pərvanə Vəliyeva bildirilib ki, müasir Azərbaycan tarixində diaspor fəaliyyətini mərhələlərə bölsək, bu, işğal dövrü, müharibə dövrü, Zəfər dövrü və sülh dövrü mərhələlərinə uyğun olaraq fəaliyyətlərdən ibarət olub.
Onun sözlərinə görə, 2020-ci ilədək diaspor fəaliyyətində əsas prioritet Ermənistanın ölkəmizin beynəlxalq səviyyədə tanınan torpaqlarının işğalının tanıdılması idi:
"İşğalın və Ermənistan hərbi birləşmələri tərəfindən törədilmiş insanlıq əleyhinə cinayətlərin, soyqırımların dünyaya çatdırılması üçün müxtəlif tədbirlər, rəsmi görüşlər təşkil olunurdu. Xüsusilə 2008-ci ildə Heydər Əliyev Fondunun vitse-prezidenti Leyla Əliyevanın təşəbbüsü ilə başlanmış “Xocalıya Ədalət!” beynəlxalq kampaniyası Xocalı soyqırımı ilə bağlı həqiqətlərin dünya ictimaiyyətinə çatdırılmasına xidmət edib.
Kampaniya çərçivəsində dünyanın bir çox ölkələrində silsilə tədbirlər, sərgilər, konfranslar, yürüşlər, sosial media aksiyaları təşkil olunub, fərqli dillərdə filmlər və kitablar hazırlanaraq beynəlxalq ictimaiyyətə təqdim edilib. Əldə edilən nəticələr arasında bir sıra dövlət parlamentlərinin və beynəlxalq təşkilatların Xocalı soyqırımını tanıması, müxtəlif şəhərlərdə qurbanların xatirəsinə abidələrin ucaldılması xüsusi vurğulanmalıdır".
“Bir sözlə, bütün dünya ictimaiyyəti işğalla barışmayacağımız faktını təkcə rəsmi şəxslərdən deyil, dünya azərbaycanlılarından da eşitdi,” – deyə o bildirib.
P.Vəliyeva qeyd edib ki, müharibə dövründə diaspor təşkilatları bütün imkanlarını səfərbər edərək nümayişlər, rallilər təşkil edib, həm də informasiya müharibəsində xaricdə yaşayan həmvətənlərimiz aktiv şəkildə iştirak ediblər:
O vurğulayıb ki, ABŞ, Almaniya, Çexiya, Fransa və digər Avropa ölkələrində yaşayan soydaşlarımızın dirənişi buna bariz nümunədir:
"Zəfər dövründə isə artıq qalib ölkə kimi diaspor nümayəndələri öz fəaliyyətlərini qürurla davam etdirərək həm revanşistlərin, həm də erməni lobbisinin iddialarına cavab verdilər. Bu mərhələdə mina problemi, itkinlərin taleyi, ətraf mühitə və mədəni irsə vurulan zərərin tanıdılması prioritetə çevrildi.
Hazırda tarixi Vaşinqton sənədinə nail olan Azərbaycan öz uğurlu diplomatiya modelini dünyaya təqdim edir. Dünya azərbaycanlılarının dövlət başçısına ünvanladığı minnətdarlıq məktubları ədalətli sülhü mümkün edən Ali Baş Komandana təşəkkürün təzahürüdür. Bu gündən sonra diaspor fəaliyyətimiz bölgədəki yeni reallıq və sülh gündəliyi nəzərə alınaraq davam etdirilməlidir. Çünki bu, son 80 ildə tam və mütləq qələbə qazanmış yeganə dövlət rəhbərinin uğur hekayəsidir.”
Onun fikrincə, tarix və qanlı keçmiş heç vaxt unudulmamalı, daim xatırladılmalıdır:
“Eyni zamanda, diaspor təşkilatlarımız Azərbaycan mədəniyyətinin dünyada tanıdılmasında mühüm rol oynayır. İştirak etdiyim beynəlxalq tədbirlərdən birində Kanadalı senatorun mənə Azərbaycan rəqslərinin Ottavanın mərkəzində çəkilmiş görüntüsünü göstərməsi diaspor fəaliyyətimizin uğurunun bariz göstəricisi idi.”
Seyranə Quliyeva
6.3.14. diaspor quruculuğu, lobbiçilik və dünya azərbaycanlılarının həmrəyliyi;
Yazı Medianın İnkişafı Agentliyinin maliyyə dəstəyi ilə hazırlanıb.
