"Bu mövsümdə on minlərlə vətəndaşın istilik təchizatı köklü şəkildə yaxşılaşdırılacaq".
Bunu Manset.az-a “Azəristiliktəchizat” ASC-nin mətbuat katibi Elvin Basqallı bildirib. Onun sözlərinə görə, daha 7 köhnə tipli qazanxananın yenidən qurulması və modernləşdirilməsi işlərinə başlanılıb.
Söhbət Nərimanov rayonu A.Nemətulla küçəsi 63 ünvanında yerləşən 92 saylı, A.Heydərov küçəsi 24 ünvanında yerləşən 86 saylı, Nizami rayonu T.Abbasov küçəsi 65 ünvanında yerləşən 515 saylı, Babək prospekti 99 ünvanında yerləşən 539 saylı, Yasamal rayonu N.Nərimanov prospekti 55 ünvanında yerləşən 140 saylı, Pirallahı rayonu 40-cı məhəllə ünvanında yerləşən 533 saylı və Səbail rayonu Badamdar qəsəbəsi Gənclər küçəsi 3 ünvanında yerləşən 504 saylı qazanxanalardan gedir.
Layihə çərçivəsində həmin qazanxanalar tamamilə söküləcək, yerində yeni binalar inşa ediləcək və ən müasir avadanlıqlar quraşdırılmaqla modernləşdiriləcək. Yeni qazanxanaların 15 noyabr istilik mövsümünə qədər istismara verilməsi nəzərdə tutulur.
Modernləşdirilən qazanxanaların ümumi gücü 20,6 MVt (17,75 Qkal/saat) təşkil edir. Bu isə 53 yaşayış binasının, 4 məktəbin, 5 uşaq bağçasının, 2 səhiyyə müəssisəsinin və 24 digər istehlakçının yüksək keyfiyyətli istiliklə təmin olunmasına imkan verəcək.
