Mütəxəssislər bildirir ki, intensiv məşqlərdən sonra nə içdiyiniz, qidalanmanız qədər önəmlidir.
Manset.az Baku.ws-ə istinadən xəbər verir ki, idman zamanı itirilmiş maye və elektrolitləri bərpa etmək üçün yalnız su içmək kifayət deyil, başqa faydalı variantlar da mövcuddur.
Elektrolit suyu: İdman zamanı bədən natrium, maqnezium və kalium kimi elektrolitləri itirir. Buna görə məşqlərdən sonra elektrolitlə zəngin su içmək tövsiyə olunur.
Portağal şirəsi: 237 ml həcmində bir stəkan 100% portağal şirəsi təxminən 29 q karbohidrat və gündəlik kalium ehtiyacının 13%-ni təmin edir. Ekspertlər su balansını qorumaq üçün şirəyə bir çimdik duz əlavə etməyi məsləhət görür.
Kokos suyu: Elektrolitlərlə zəngin olan kokos suyu, təbii idman içkisi əvəzi kimi istifadə olunur. Tədqiqatlar göstərir ki, kokos suyu və kommersiya idman içkiləri idmançılarda bərpa və hidratasiya baxımından oxşar nəticə verir. Şəkərsiz variantı seçmək tövsiyə olunur.
Proteinli kokteyllər: Amin turşuları ilə zəngin olan bu kokteyllər məşqlər zamanı zədələnmiş əzələlərin bərpasına və yeni əzələlərin inkişafına kömək edir. Kokteylə karbohidrat əlavə etmək isə qlikogen ehtiyatlarını bərpa etməyə yardım edir.
Şokoladlı süd: Karbohidrat və protein mənbəyi olan şokoladlı süd bərpaedici içkilər arasında effektivliyi ilə seçilir. Tədqiqatlar göstərir ki, digər bərpaedici içkilərlə müqayisədə bəzən daha təsirlidir.
Acı gilas şirəsi: Antioksidant və iltihab əleyhinə təsir göstərən antosiyaninlərlə zəngindir, məşqlərdən sonra əzələlərin bərpasına kömək edir və gecikmiş əzələ ağrılarını azaldır.
Ev şəraitində elektrolit içkiləri: Hazırlamaq üçün sadə inqrediyentlər kifayətdir: su, limon şirəsi, bir çimdik duz və bir çay qaşığı təbii şirinləşdirici (bal və ya şəkər siropu).
Ekspertlər idmançılara məşqlərdən sonra bu içkiləri istifadə etməyi tövsiyə edirlər ki, həm bədən bərpası sürətləsin, həm də elektrolit balansı qorunsun.
