İsti hava şəraitində düzgün qidalanma sağlamlıq üçün mühüm rol oynayır. Həkimlər bildirirlər ki, bəzi qidalar yay aylarında qida zəhərlənməsi, susuzlaşma və həzm problemləri riskini artıra bilər.
Manset.az Baku.ws-ə istinadən xəbər verir ki, mütəxəssislərin sözlərinə görə, yüksək temperaturda tez xarab olan məhsullar xüsusi diqqət tələb edir. Bunlara xüsusilə mayonezli salatlar, kremli desertlər və uzun müddət otaq temperaturunda saxlanılan yeməklər daxildir.
Həkimlər bildirirlər ki, yayda açıq şəkildə satılan və düzgün saxlanmayan ət və süd məhsulları da təhlükə yarada bilər. Bu cür məhsullar bakteriyaların sürətlə çoxalması üçün əlverişli mühit yaradır.
Bundan əlavə, çox yağlı və qızardılmış yeməklər isti havada orqanizmə əlavə yük salır. Bu qidalar həzmi çətinləşdirir və yorğunluq hissini artıra bilər.
Mütəxəssislər həmçinin çox şirin və qazlı içkilərin də yayda məhdudlaşdırılmasını tövsiyə edirlər. Bu içkilər susuzluğu artırır və orqanizmin su balansını poza bilər.
Həkimlər qeyd edirlər ki, yay mövsümündə daha çox təzə meyvə, tərəvəz və bol su qəbuluna üstünlük verilməlidir. Bu, həm immun sistemini gücləndirir, həm də bədənin temperatur balansını qorumağa kömək edir.
