Rusiyanın Belqorod şəhərinin keçmiş meri və Belqorod vilayətinin sabiq vitse-qubernatoru Konstantin Polejayev Ukraynadakı müharibədə həlak olub.
Manset.az Modern.az-a istinadən xəbər verir ki, bu barədə Rusiyanın “Fonar” nəşri məlumat yayıb.
Bildirilib ki, 53 yaşlı sabiq məmur pilotsuz uçuş aparatının hücumu nəticəsində ölüb.
Konstantin Polejayev 2015–2019-cu illərdə Belqorod şəhərinin meri vəzifəsində çalışıb. Daha sonra vilayət qubernatorunun müavini təyin olunub. O, bu vəzifədə olarkən Şebekino və Novaya Tavoljanka yaşayış məntəqələrinin bərpasına da cavabdehlik daşıyıb.
Polejayev 2023-cü ildə vəzifəsindən azad edilib, bir müddət sonra isə rüşvət işi üzrə saxlanılıb. O, 2024-cü ildə məhkəmənin qərarı ilə 5 il müddətinə azadlıqdan məhrum olunub.
Bundan sonra keçmiş məmur Rusiya Müdafiə Nazirliyi ilə müqavilə bağlayaraq Ukraynadakı döyüşlərə göndərilib.
