İtaliyada 9 və 6 yaşlı iki oğlanın xarici dünya ilə əlaqəsi tamamilə kəsilmiş vəziyyətdə tapılıb. İki uşağın atası koronavirusdan qorxaraq onları illərdir meşə daxmasında saxlayıb.
Manset.az Lent.az-a istinadla xəbərinə görə, İtaliyada daha çox film süjetini xatırladan detallar ortaya çıxıb. 9 və 6 yaşlı iki oğlanın xarici dünya ilə əlaqəsi tamamilə kəsilmiş vəziyyətdə tapılıb. İtaliya mətbuatının məlumatına görə, Hollandiyadan olan ata koronavirus qorxusundan uşaqları Turin yaxınlığındakı meşədə tərk edilmiş fermer evində gizlədib.
Uşaqların məktəbə getmədiyi, həkimə müraciət etmədiyi və düzgün danışa bilmədiyi bildirilir. İtaliya hakimiyyəti indi onların atalarından alınaraq himayədarlığa verilməsini tələb edir.
Müstəntiqlərin fikrincə, atanın "koronavirusa yoluxma ehtimalı olub və uşaqların yoluxa biləcəyi qorxusu ilə yaşayıb". Ata, 46 yaşlı Frederik, günahını rədd edir. O deyir ki, uşaqlar xoşbəxt idilər, poni, xizək sürüblər, ingilis və italyan dillərində oxuyublar.
Kişinin sözlərinə görə, həm Almaniyada, həm Hollandiyada daşınmaz əmlakı icarəyə verməklə, həm də yaradıcılığı ilə pul qazanır.
Göründüyü kimi, ailə üç il əvvəl Almaniyadan İtaliyaya köçüb, lakin iki oğlanın Mərakeşdən olan anası vəziyyəti şərh etməyib.
