ABŞ Prezidenti Donald Tramp administrasiyası əcnəbi tələbələrin ölkədə qalma müddətini məhdudlaşdıran yeni qaydalar layihəsini açıqlayıb.
Manset.az xəbər verir ki, yeni tənzimləməyə əsasən, tələbələrin ABŞ-də qalma müddəti maksimum 4 il olacaq. Hazırda bu müddətə konkret məhdudiyyət qoyulmur.
Təhsilini başa vuran şəxslər ölkəni 60 gün ərzində tərk etməli və ya hüquqi statuslarını yeniləməlidirlər.
Qaydalar mədəni mübadilə proqramı iştirakçılarına və xarici media nümayəndələrinə də şamil olunacaq. Xarici jurnalistlərin ölkədə qalma müddəti 240 günlə məhdudlaşdırılır və yalnız bir dəfə eyni müddətə uzadıla bilər.
ABŞ Daxili Təhlükəsizlik Departamentindən bildirilib ki, məqsəd təhlükəsizlik risklərinin qarşısını almaq və viza sistemindən sui-istifadəni məhdudlaşdırmaqdır.
Son aylarda tələbə vizalarına nəzarət gücləndirilib. Bu il ərzində 6 mindən çox viza ləğv olunub. Ləğvlərə əsas səbəblər kimi viza müddətindən sonra ölkəni tərk etməmək, cinayət hallarına qarışmaq və “terrorçuluğa dəstək” göstərilib.
Yeni qaydaların on minlərlə əcnəbi tələbənin hüquqi statusuna təsir edəcəyi gözlənilir.
