TikTok platforması birbaşa mesajlaşma (DM) funksiyasını yeniləyərək istifadəçilərə daha zəngin ünsiyyət imkanları təqdim edir.
Manset.az xarici mediaya istinadən xəbər verir ki, əvvəllər yalnız mətn, GIF-lər, stikerlər və TikTok məzmunu göndərmək mümkün idisə, yeni yeniləmə ilə səsli qeydlər, şəkillər və videolar paylaşmaq da mümkün olacaq.
Yeniliklər həm təkbətək, həm də qrup söhbətlərində istifadə edilə biləcək. İstifadəçilər söhbət ekranından birbaşa audio yaza, 60 saniyəyə qədər səsli qeydlər göndərə biləcəklər. Hər mesajda doqquza qədər foto və ya video paylaşmaq mümkündür.
Yeni xüsusiyyətin yayımı növbəti həftələrdə tədricən həyata keçiriləcək. Qeyd edək ki, 16 yaşdan kiçik istifadəçilər üçün DM-lər bağlı qalacaq, 16-18 yaş arası istifadəçilər isə əlavə təhlükəsizlik tədbirləri ilə qorunacaq. Yaşı 18-dən yuxarı olanlar isə istədikləri təqdirdə təhlükəsizlik filtrlərini aktivləşdirə bilərlər.
Bundan əlavə, TikTok son zamanlar mövzu idarəçiliyi və süni intellekt əsaslı açar söz filtrləri əlavə edib. Tətbiqdə Tako adlı chatbot və şəkilləri videoya çevirən “AI Alive” funksiyası da mövcuddur.
