Pakistanın Gilgit-Baltistan bölgəsində helikopter qəzası baş verib.
Manset.az "Dawn" qəzetinə istinadən xəbər verir ki, hadisə nəticəsində 5 nəfər həyatını itirib.
Məlumata görə, qəza Gilgit-Baltistan hökumətinin sözçüsü Faizullah Faraqın bildirdiyinə əsasən, bölgənin Çilas şəhərində qeydə alınıb.
Bölgə polisinin əməkdaşı Əbdül Həmidin sözlərinə görə, qəza yerli hakimiyyət orqanlarına məxsus helikopterin yeni uçuş-enmə zolağına eniş etməyə çalışarkən baş verib.
Qəza yerinə dərhal polis və axtarış-xilasetmə qrupları cəlb olunub.
Qəzanın dəqiq səbəbləri hələlik açıqlanmayıb. Lakin bəzi rəsmi şəxslər insidentin "texniki nasazlıq" səbəbindən baş verdiyini ehtimal edirlər.
