İndoneziyanın Yava adasının şərqində yerləşən Semeru vulkanında bu gün iki dəfə püskürmə müşahidə edilib.
Manset.az xarici mediaya istinadən xəbər verir ki, Semeru vulkanının müşahidə bürosunun rəsmiləri, vulkanın eyni gündə iki dəfə püskürdüyünü bildirib. İlk püskürmə yerli vaxtla səhər saat 5:01-də baş verib və təxminən 140 saniyə davam edib, lakin vizual olaraq qeydə alınmayıb.
İkinci püskürmə isə yerli vaxtla saat 09:28-də baş verib və təxminən 145 saniyə sürüb. Bu püskürmə zamanı dağdan püskürən külün hündürlüyü təxminən 500 metrə çataraq cənub-qərb istiqamətində hərəkət edib.
Səlahiyyətlilər Semeru vulkanının hələ də "2-ci Xəbərdarlıq" səviyyəsində olduğunu və vulkanın zirvəsindən 8 kilometr uzaqlıqdakı Besuk Kobokan bölgəsinin cənub-şərq hissəsində bütün fəaliyyətlərin qadağan edildiyini açıqlayıblar.
İndoneziya, "Sakit Okean Atəş Halqası" vulkanik qurşağında yerləşdiyi üçün 130-a yaxın aktiv vulkanın olduğu bir ölkədir.
