Almaniya kansleri Fridrix Merts Berlində keçirilən Amerika nümayəndə heyəti ilə Ukrayna prezidenti Volodimir Zelenski arasında danışıqları tərk edib.
Manset.az xəbər verir ki, Ukrayna sülh prosesi ilə bağlı görüş ABŞ Prezidentinin elçisi Stiv Uitkoff, Cared Kuşner və Ukrayna Prezidentinin iştirakı ilə Federal Kanslerlikdə baş tutub. Məlumata görə, Merts danışıqların yalnız ilkin mərhələsində iştirak edib və iştirakçıları qısa salamladıqdan sonra zaldan çıxıb. Daha sonra müzakirə onun xarici siyasət və təhlükəsizlik üzrə müşaviri Günter Sautterin moderatorluğu ilə davam edib.
Merts özü nümayəndə heyətlərinin görüşünün videosunu X sosial media platformasında paylaşıb və Almaniyanın Ukraynada davamlı sülhə nail olmağı gözlədiyini qeyd edib. O, tərəflərin hələ də müzakirə etməli olduğu çətin məsələlərin olacağını vurğulayıb, lakin irəliləməyə hazır olduğunu bildirib.
Qeyd edək ki, Vaşinqton və Kiyevdən olan nümayəndə heyətləri ABŞ Prezidenti Donald Trampın sülh planını müzakirə etmək üçün Berlində görüşə başlayıblar.
