Yaxın gələcəkdə klassik duşların yerini "insan yuma maşınları" ala bilər. Bu futuristik texnologiya artıq reallığa çevrilmək üzrədir.
Manset.az xəbər verir ki, Yaponiyada gələcəyin duş anlayışı üzərində aparılan araşdırmalar nəticəsində tamamilə fərqli bir sistem hazırlanıb. Adi duş başlığı və su axını əvəzinə, insan bədənini avtomatik şəkildə yuyan, masaj edən və rahatladan xüsusi kapsul təqdim olunur. Bu sistem mahiyyət etibarilə insanlar üçün nəzərdə tutulmuş bir növ "paltaryuyan maşın" kimi işləyir.
"Gələcəyin İnsan Yuma Maşını" yuyunma təcrübəsini fərdiləşdirmək üçün ultrasəs dalğaları ilə süni intellekti birləşdirir. Osaka mərkəzli Science Co. şirkəti tərəfindən hazırlanan cihaz ilk dəfə Expo 2025 sərgisində nümayiş etdirilib.
Ziyarətçilər qapalı kapsulun içinə uzanır və bütün təmizlik prosesi avtomatik həyata keçirilir. Kabin əvvəlcə isti su və xırda hava köpükləri ilə dolur, proses sakitləşdirici musiqi və təbiət görüntüləri ilə müşayiət olunur. Bu köpüklər sabun istifadə olunmadan kir və ölü dəri hüceyrələrini təmizləyir.
Sensorlar istifadəçinin dəri tipini və ruh halını real vaxt rejimində analiz edir. Buna uyğun olaraq işıq effektləri və ətirlər seçilir, rahatladıcı atmosfer yaradılır. Son mərhələdə su püskürtmə sistemi bədəndə qalan bütün qalıqları aradan qaldırır. İstifadəçinin yuyunma zamanı hər hansı ovma və ya hərəkət etməsinə ehtiyac qalmır. Yuma və qurulama daxil olmaqla bütün proses təxminən 15 dəqiqə çəkir.
Yay aylarında keçirilən sorğuya əsasən, istifadəçilərin 77,6 faizi bu təcrübəni "çox məmnunedicı", 21,1 faizi isə "məmnunedicı" kimi qiymətləndirib.
Əvvəlcə satışa çıxarılması planlaşdırılmayan bu cihaz üçün şirkət artıq Yaponiyadakı otellərdən 6 ədəd sifariş alındığını açıqlayıb.
Cihazın mürəkkəb mexaniki hissələri, böyük ölçüsü və mövcud evlərə quraşdırılmasının çətinliyi onun qiymətini xeyli artırır. Şirkət nümayəndələrinin sözlərinə görə, bu sistemin dəyəri "idxal olunan lüks avtomobil qiymətinə yaxın" olacaq.
