Dəniz ulduzları düşündüyümüzdən qat-qat daha qeyri-adi canlılardır.
Manset.az Ölkə.az-a istinadən xəbər verir ki, elmi araşdırmalara görə, dəniz ulduzlarının nə beyni, nə də ürəyi var. Bunun əvəzinə, bədənlərinə yayılmış sinir şəbəkəsi sayəsində hərəkət edir və ətraf mühiti hiss edə bilirlər.
Bu canlılarda mərkəzi beyin əvəzinə, qollarına qədər uzanan sinir sistemi mövcuddur. Bu quruluş sayəsində onlar istiqamətlərini müəyyən edə və koordinasiyalı şəkildə hərəkət edə bilirlər.
Bundan əlavə, dəniz ulduzlarında klassik qan dövranı sistemi də yoxdur. Onun yerinə “su damar sistemi” adlanan xüsusi mexanizm işləyir. Dəniz suyu bədən daxilində dövr etdirilərək oksigen və qida maddələrinin daşınması təmin olunur.
Qısacası, dəniz ulduzları öyrəşdiyimiz canlı sistemlərindən tamamilə fərqli işləyən, amma bir o qədər də heyranedici canlılar sırasındadır.
