Türkiyənin Enerji və Təbii Sərvətlər Nazirliyinin Mədənçilik və Neft İşləri üzrə Baş İdarəsi (MAPEG) 115 mədən sahəsinin hərraca çıxarılacağını elan edib.
Manset.az türk mediasına istinadən xəbər verir ki, "Rəsmi Qəzet"də dərc olunan elana əsasən, sahələrin yerləşdiyi əyalət, koordinatlar, faydalı qazıntı qrupu, sahə ölçüsü və texniki xüsusiyyətləri ilə bağlı məlumatlar qurumun rəsmi internet səhifəsində azı 15 gün müddətində yayımlanacaq.
Hərracda iştirak etmək istəyən tərəflər müraciətlərini elan edilmiş gündə saat 09:00 ilə 09:30 arasında MAPEG-in Atilla Şinasi Özdemir Konfrans Zalındakı komissiyaya şəxsən təqdim etməlidirlər; poçt və ya kuryer vasitəsilə göndərilən sənədlər qəbul edilməyəcək. İştirakçılar ilkin hərrac qiymətinin azı 20%-i miqdarında təminat depoziti təqdim etməlidirlər və ilkin qiymətdən aşağı təklif verən iddiaçılar hərrac mərhələsinə buraxılmayacaqlar.
Hərrac ödənişini və tələb olunan qanuni ödənişləri vaxtında həyata keçirməyən qaliblərin təminat depozitləri xəzinəyə keçiriləcək və onların hərracla bağlı hüquqları ləğv ediləcək. Lisenziyalaşdırma prosedurları ilə bağlı bütün öhdəliklər bir il ərzində yerinə yetirilməlidir; əks təqdirdə, lisenziya hüququ qüvvədən düşəcək və əvvəlcədən ödənilmiş rüsumlar geri qaytarılmayacaq. Müraciət daxil olmayan sahələr daha sonrakı tarixdə yenidən hərraca çıxarılacaq.
