Amazon yağış meşələrinin üzərində aparılan yeni LIDAR tədqiqatı nəticəsində qədim dövrə aid yüzlərlə indiyədək məlum olmayan tikili üzə çıxarılıb.
Manset.az-ın xarici mediaya istinadən xəbərinə görə, əldə olunan məlumatlar göstərir ki, bu ərazidə mövcud olmuş qədim sivilizasiya indiyədək güman ediləndən xeyli böyük olub və çiçəklənmə dövründə milyonlarla insanın yaşadığı məkan ola bilməsi ehtimal edilir.
Məlumata görə, e.ə. 600-cü ildən eramızın 850-ci ilinə qədər Amazon hövzəsinin cənub-qərb hissəsində mövcud olmuş Akiri sivilizasiyası bölgədə xəndəklərlə əhatələnmiş nəhəng həndəsi torpaq qurğuları – geoqliflər inşa edib.
Helsinki Universitetinin arxeoloq-antropoloqu Martti Parssinenin rəhbərlik etdiyi beynəlxalq tədqiqat qrupu LIDAR texnologiyasından istifadə etməklə havadan lazer skanları aparıb və bunun sayəsində sıx yağış meşələrinin örtüyü altında gizlənən qədim tikililərin xəritəsini hazırlayıb.
