Moskva administrasiyasının ixrac olunmayan təbii qazı digər bazarlara, xüsusilə də Çinə satmağı planlaşdırdığı bildirilib.
Manset.az-ın xarici mediaya istinadən məlumatına görə, Rusiyanın enerji şirkəti “Qazprom” Avropaya təbii qaz nəqlini dayandırdıqdan sonra boru kəmərləri kifayət etmədiyi üçün qazı asanlıqla başqa ölkələrə yönəldə bilmir.
Müharibədən əvvəl Rusiya Avropanın təbii qaz ehtiyacının 40 faizini qarşılayırdı.
Fransada bu nisbət yüzdə 17, Almaniyada yüzdə 55, Bolqarıstanda isə 85 faizə qədər idi.
Ötən il 700 milyard kubmetrdən çox təbii qaz hasil edən Rusiya bunun təqribən 400 milyard kubmetrini daxili bazarda istifadə edib, 180 milyard kubmetrini isə Avropaya ixrac edib.
Rusiya qazının qalan hissəsi Çin kimi digər ölkələrə satılıb.
Lakin bu yaxınlarda Rusiya “Şimal axını 1” boru kəməri ilə Avropaya qaz nəqlini 60 faiz azaldıb.
Avropaya axmayan bu əlavə qazla Rusiyanın nə edəcəyi məsələsi spekulyasiyalara səbəb olub.
“Qazprom”un prezidenti Aleksey Miller Sankt-Peterburqda Beynəlxalq İqtisadi Forumunda bəyan edib ki, Rusiya gələcəkdə müxtəlif sektorlarda qaza daha çox diqqət yetirəcək.
O, qeyd edib ki, qazın qiymətinin artması və Asiya ölkələrinə ixracın artması Rusiyanın ixracatındakı itkiləri kompensasiya etməyə kömək edib.
Moskva administrasiyasının Avropaya ixrac olunmayan təbii qazı digər bazarlara, xüsusilə də Çinə satmağı düşündüyü təxmin edilir.
Bununla belə, bunun alternativ boru kəməri birləşmələri və LNG mayeləşdirmə imkanları məhdud olduğu üçün logistika baxımından asan olmayacağı bildirilib.
Rusiya keçən il 20 milyard kubmetr təbii qaz göndərdiyi Çinə hər il 100 milyard kubmetr təbii qaz satmağı hədəfləyir.
Ancaq bu məbləğin Rusiyanın bu günə qədər ən böyük müştərisi olan Avropanı əvəz etməyə kifayət etməyəcəyi bildirilir.
Mütəxəssislər təbii qaz yatağının istehsal gücünü azaltmaq, eləcə də yatağı tamamilə bağlamağın texniki cəhətdən mümkün olduğunu deyirlər.
Lakin daha uzun fasilə zamanı qazı daşıyan borularda korroziya yarana bilər.
Rusiyanın təxminən 72 milyard kubmetr tutumu olan təbii qaz anbarları var. Bu da o deməkdir ki, Rusiya dünyanın ən böyük qaz anbarlarına malik ölkəsidir.
