Teleaparıcı Azər İsmayılovun (Azər Zahid) Qazi Amil Əliyevə qarşı etdiyi qeyri-etik hərəkət cavabsız qalmayıb.
Manset.az-ın əldə etdiyi məlumata görə, Qazi baş leytenant Pərvin Abdullayev A.İsmayılova zəng edərək, kəskin etirazını bildirib. Bundan sonra tərəflər arasında dava yaranıb. Teleaparıcı Qazini hüquq-mühafizə orqanlarına şikayət edəcəyi ilə hədələyib.
Qeyd edək ki, Azər İsmayılovun sosial şəbəkədə yayılan videosu tənqid edilib. İsmayılov TikTok-da canlı yayımda yığılan məbləği qazilərə vermək üçün onlarla bir araya gəlib.
Gözdən əlil qazi Amil Əliyevə zərfi verən Azər "Onsuz saya bilməyəcəksən" sözlərini deyib. Aparıcının bu qeyri-etik ifadəsi sosial şəbəkədə sərt şəkildə tənqid olunub.
Qeyd edək ki, Amil İkinci Qarabağ müharibəsində yaralanıb və iki gözünü itirib. 22 yaşlı Amil düşmən postunda minaya düşərək ağır yaralanıb və 3 gün komada qalıb.
