Olimp dağı UNESCO-nun Ümumdünya İrs Siyahısına daxil edilib
Manset.az xarici mediaya istinadən xəbər verir ki, Yunanıstanın ən yüksək zirvəsi olan Olimp dağı 12 illik gözləmədən sonra UNESCO-nun Ümumdünya İrs Siyahısına daxil edilib.
Qərar Cənubi Koreyanın Busan şəhərində keçirilən UNESCO-nun Ümumdünya İrs Komitəsinin 48-ci sessiyasında qəbul olunub. Qərara əsasən, Olimp dağı mədəni və təbii əhəmiyyətinə görə siyahıya "qarışıq irs obyekti" kimi əlavə edilib.
Bu qərar Yunanıstanda böyük sevinclə qarşılanıb. Ölkənin Baş naziri Kiriakos Mitsotakis sosial media hesabında paylaşdığı açıqlamada bunu "mühüm milli nailiyyət" kimi qiymətləndirib.
"Bu gündən etibarən əfsanəvi Olimp dağı təkcə Yunanıstana deyil, bütün bəşəriyyətə məxsusdur və o, əbədi olaraq qorunub saxlanılmalıdır", – deyə Mitsotakis bildirib.
Dəniz səviyyəsinə yaxın ərazidən başlayaraq 2 918 metr hündürlüyə yüksələn Olimp dağı 2014-cü ildən UNESCO-nun ilkin siyahısında yer alırdı. Yunanıstanın təxminən 12 il əvvəl irəli sürdüyü namizədlik Busandakı komitə iclasında yekdilliklə təsdiqlənib.
Yunanıstanın UNESCO-dakı nümayəndə heyətinin rəhbəri Georgios Kumutsakos qərarın dağın qorunması baxımından mühüm əhəmiyyət daşıdığını vurğulayıb. O bildirib ki, bu qərar "Olimpin indiki və gələcək nəsillərin rifahı naminə qorunması öhdəliyini bir daha təsdiqləyir".
