Qərbi Avropada iyun və iyul aylarında orta temperatur mövsüm normasından 2,79 dərəcə yüksək olub. Temperatur 21,62 dərəcəyə çataraq rekord göstəriciyə yüksəlib.
Manset.az xəbər verir ki, iyul ayı həmçinin qlobal miqyasda qütb bölgələri istisna olmaqla, okeanlar üçün tarixdə ən isti ay kimi qeydə alınıb.
Atlantik okeanı və Aralıq dənizinin qərb hissəsində müşahidə olunan rekord temperaturun dəniz ekosisteminə və sahilyanı ərazilərdə yaşayan icmalara mənfi təsir göstərdiyi bildirilib.
Avropada isti hava dalğalarının səbəb olduğu amillərlə əlaqədar 25 mindən çox insanın həyatını itirdiyi bildirilib. Köhnə infrastruktur və kondisionerlərdən istifadənin kifayət qədər geniş olmaması isə yüksək temperaturla mübarizəni çətinləşdirib.
Avropa Orta Müddətli Hava Proqnozları Mərkəzinin iqlim üzrə mütəxəssisi Samantha Burgess bildirib ki, yüksək temperatur və quraqlıq bir-birini gücləndirir. Torpağın quruması onun təbii soyutma qabiliyyətini azaldır.
Fransa, İspaniya, Almaniya və İngiltərənin bəzi bölgələrində yağıntı və torpaq nəmliliyi səviyyələri rekord dərəcədə aşağı düşüb.
Rekord istilər Avropada meşə yanğınlarının da artmasına səbəb olub. İspaniya, Fransa və İtaliyada baş verən yanğınlar nəticəsində 1,23 milyon akrdan çox ərazi yanıb, yüz minlərlə insan yaşadığı ərazidən təxliyə edilib.
Quraqlıq Sen, Reyn və Dunay çaylarında suyun səviyyəsinin kəskin azalmasına səbəb olub. Dunay çayında suyun həddindən artıq azalması nəticəsində Macarıstan və Rumıniyada çaydan soyutma suyu alan nüvə reaktorlarında istehsal müvəqqəti dayandırılıb.
