Bu gün Portuqaliyanın Porto şəhərində ATƏT Parlament Assambleyasının (PA) 32-ci illik sessiyası çərçivəsində İpək Yolu Qrupunun 14-cü iclası keçirilib.
Manset.az xəbər verir ki, iclası giriş sözü ilə
açan İpək Yolu Qrupunun rəhbəri, ATƏT PA-nın Komitə sədri Azay
Quliyevin üzv ölkələrin göstərdiyi
yüksək marağı və verdikləri dəyərli töhfələri alqışlayaraq onlara təşəkkürünü
bildirib.
Gündəlik təsdiqləndikdən sonra çıxış edən ATƏT PA-nın Prezidenti xanım Pia
Kauma, İpək Yolu Qrupunun Assambleyanın ikinci ölçüsünü gücləndirən, inklüziv
və şəffaf fəaliyyət göstərən əsas platformalardan birinə çevrildiyini
vurğulayıb.
ATƏT PA-nın Baş katibi cənab Roberto Montella isə çıxışında Qrupun təşkilata
yeni ideyalar qazandırmaq, dövlətləri ortaq maraqlar ətrafında birləşdirmək
baxımından uğurlu model olduğunu bildirib və bu platformadan əldə olunan
faydanı yüksək qiymətləndirib.
İclas zamanı San Marinonun İpək Yolu Qrupuna üzvlük müraciəti müzakirəyə
çıxarılıb. San Marino nümayəndə heyətinin rəhbəri Oskar Mina ölkəsinin qrupa
olan böyük marağını ifadə edərək, rəsmi şəkildə üzvlük istəklərini bəyan edib.
Müzakirələrin ardından məsələ səsverməyə qoyulub və yekdilliklə dəstəklənərək
San Marino İpək Yolu Qrupunun 28-ci üzvü olub.
İclasda 2025-ci ilin may ayında Monteneqroda keçirilmiş 5-ci Beynəlxalq
Konfransın nəticələrinə dair Monteneqro tərəfinin hesabatı dinlənilib və qəbul
edilən qərarlar müzakirə olunub.
Həmçinin 2026-cı ilin yanvar ayında İpək Yolu Qrupu ilə Qara Dəniz İqtisadi
Əməkdaşlıq Təşkilatının Parlament Assambleyasının (QDİƏT PA) birgə tədbirinin
keçirilməsi təklifi gündəmə gəlib. QDİƏT PA-nın Baş katibi Asəf Hacıyev
tədbirin İstanbulda və ya təşkilata üzv digər ölkələrdən birində keçirilməsini
təklif edib. Gürcüstan nümayəndə heyətinin rəhbəri Nikoloz Samxaradze isə
ölkəsinin bu tədbirə ev sahibliyi etməyə hazır olduğunu bəyan edib.
Daha sonra İpək Yolu Qrupunun 6-cı Beynəlxalq Konfransının keçirilməsi
məsələsinə baxılıb. San Marino nümayəndə heyətinin rəhbəri Oskar Mina bu
tədbiri 2026-cı ilin may ayında ölkəsində keçirmək istədiyini qeyd edib və
tədbirin əsas mövzusunun dezinformasiya və yalan xəbərlərlə mübarizəyə həsr
olunmasını təklif edib.
Özbəkistan nümayəndə heyətinin rəhbəri
Sadiq Safayev isə alternativ olaraq konfransın Səmərqənddə keçirilməsini
və mövzu kimi beynəlxalq nəqliyyat məsələlərinin seçilməsini irəli sürüb.
Sonda çıxış edən Azay Quliyev, İpək Yolu Qrupunun tədbirlərinə ev sahibliyi
etmək istəyən ölkələrin artmasının qrupun nüfuzunun göstəricisi olduğunu
vurğulayıb və QDİƏT PA-ya, Gürcüstana, San Marinoya və Özbəkistana təşəkkürünü
bildirib.
Qərara alınıb ki, təqdim olunan bütün təkliflər diqqətlə dəyərləndiriləcək
və üzv ölkələrlə aparılacaq məsləhətləşmələrdən sonra yekun qərar ATƏT PA-nın bu ilin 17–19 noyabr
tarixlərində İstanbulda keçiriləcək payız sessiyasında elan ediləcək.
