Qırğızıstanda Türk Dövlətləri Təşkilatının üzv ölkələrinin energetikləri arasında “Peşə ustalığı yarışları” keçirilib. Azərbaycanı bu yarışda “Azərişıq” ASC 6 nəfərlik heyətlə təmsil edib.
Açılış mərasimində Qırğızıstan Respublikasının energetika
nazirinin müavini Usenova Nazgül Jorobelovna və “Qırğızıstan Milli Elektrik Şəbəkəsi”
ASC-nin sədri Altınbek Rısbekov komandaları salamlayıblar. Türk dövlətlərinin qədim
tarixindən danışılıb, bu yarışların onlar arasındakı dərin bağları daha da möhkəmləndirəcəyi
vurğulanıb.
3 mərhələ üzrə 2 gün ərzində keçirilən “Peşə
Ustalığı Yarışları”nda “Azərişıq” ASC-nin komandası “Ən yaxşı iş icraçısı” və “Ən
yaxşı hakim işi” nominasiyaları üzrə bütün rəqiblərini üstələyərək qalib
olublar. Ümumi nəticədə gənc energetiklərimiz yarışı 3-cü pillədə başa vurublar.
Xatırladaq ki, Türk Dövlətləri Təşkilatının üzv ölkələrinin
energetikləri arasında “Peşə ustalığı yarışları” ilk dəfə “Azərişıq” ASC-nin təşkilatçılığı
əsasında Ümummilli Lider Heydər Əliyevin 100 illik yubileyi münasibəti ilə
Hadrutda keçirilib. Növbəti yarışlar bu ilin oktyabrında Özbəkistanda təşkil
olunacaq.
